Йиз сабпи Рамазандин ваз
Йиз сабпи Рамазандин ваз
Ассаламу аьлайкум, гьюрматлу ватанагьлийир! Му ужувлан газат урхури гизаф йисар вуйиз. Газатар урхуз аьшкь айир вуза. Гьеле узу лап диндихъ хъайир даршра, фицдар вушра аьгъюваларикан, мялуматарикан жвуваз мянфяаьт шул кlури, урхуз ккунир вуза.
Му Рамазандин вазли сакьюбкьан ушв дисурза кlури ижми ният гъапlунза. Улихь йисари жюрбежюр уьзрар айивалиан саб ушвкьан бисури гъахьундайза. Магьа гьаму Рамазандин вазли сабпи йигъан ушв гъибисган, кlваз лап рягьят гъабхьнийиз. Мукьан рягьятди ушв бисуз шул кlури, фикир дайиз. Сабдихъди саб бисури, вари Рамазандин вазлин муддатнаъ ушвар дисураза.
Дупну ккундуки, гирами Рамазанадин вазли Аллагьу Тааьлайи ужуб ният гъапlу ксариз кюмек тувру. Гьар йисан ушв бисуз шулдарзухьан кlури, жюрбежюр себебар агури шуйза, хъа гьаму йисан ужуб ният гъапlган, магьа Аллагьу Тааьла кюмек шулазуз.
Гьаму узусиб гьялнаъ айидар хъанара ашул кlури, фикир вуйиз. Гьюрматлу гъардшар ва чйир, уьзур туврурра, дидиз сабаб туврурра Аллагь ﷻ ву. Ушв бисуз шулдарчухьан кlури мигъибтанай. Саб ражарикьан ушв бисуз ният дапlну хъюгъну ккун, эгер шулдарш, жандин сагъвал адарш, ухьуз шариаьтдиъ гьибтуз ихтияр тувра. Хъа уьмриъ саб ражарикьан бисуз ният дарапlди, шулдарзухьан кlури, гъибтуб ужу дар. Аллагьу Тааьлайик умуд кивну, дугъкан ушв бисуз кьувват тувуб ккун апlури, ният апlинай. Гирами Рамазандин вазли Аллагьу Тааьла кюмек шулу.
Пайгъамбарин ﷺ гьядисдиъ дупна: «Ушв бисувал жегьеннемдин цlихьан вуйи гъалхан ву».
Жара гьядисдиъ дупна: «Гьарсаб шейънан чан марццишин а. Жандин марццишин ушв бисувал ву. Ушв бисувал сабур апlувалин гьацl ву».
Ухьуз варидариз текрар хьуз кlури, гьаму узуз аьгъю кьюб гьядис кlваин гъапlунза. Гьядисар, аятар хуз узу аьлим дарза, хъа аьлимарикан узуз гъеебхьуб магьа кlваин апlураза.
Я Рабби, гьаму Рамазандин вазли учу гъапlу ужувлан ляхнар, гъидису ушвар кьабул апlина. Ич гунгьарин аьфв апlина, учуз ужувлар тува. Эгер уву учухьна Яв рягьимлувал улулупиш, учхьан фукlара апlуз шулдар. Яв рягьматдихьан, Пайгъамбарин ﷺ шафааьтдихьан учу ярхла мапlана.
Газат урхурайидариз йиз насигьят: магьа узура саб кьадар яшариз дуфнайи кас вуза. Саб кьадар му уьмриъ ужубра, харжибра гъябкъю кас вуза. Гьаддиз учвкан ккун апlураза, анжагъ ужувлариз ният апlинай, иблисдин, шейтlнин амрарикк ккахъну чlурувалар мапlанай.
