Мугьяррам, цIийи йисандин сабпи ваз
Мугьяррам мусурман календариинди цIийи йисандин сабпи ваз ву. Думу дявйир апIуз, ифи удубзуз ва гьамцдар жара чIуру ляхнар гъахуз гъадагъа дапIнайи юкьуб вазликан сабунуб ву. Мугьяррам гирами ваз вуйиваликан Кьур’андин сурайиъ дибикIна. Гьаддиз гьарсар мусурман кас гьадму ваз Аллагьдин ﷻ гъуллугънаъ ади адапIуз чалишмиш духьну ккунду. Гьадму ваз ухьу фици гьапIиш, вари йисра гьаци гъябгъиди.
Имам Гъазалийи "Игь’я" кIуру чан китабдиъ бикIурайиганси, эгер Мугьяррамдин ваз ибадат апIури адапIиш, дидин берекет йискьубан имбу вазаризра шлубдик умуд кивуз шулу.
Муслимди ктибту гьякьлу гьядисдиъ дупна: "Рамазандин кьяляхъ ушвар дисуз варитIан ужубсиб ваз Мугьяррамдин ваз ву". ТIабаринийи дубхнайи тмуну гьядисдиъ дупна: "Мугьяррам вазлиъ сад йигъан ушв гъибисурин 30 ушв гъидисганси гьисаб апIиди". Сабсана гьядисдиз асас духьну, Мугьяррам вазлиъ хамис, жвуми ва элгьет йигъари гъидису ушвариз артухъди кьимат тувру.
Имам Нававийи (гъит дугъкан Аллагь ﷻ рази ишри) "Заваиду рравза" кIуру китабдиъ бикIура: "ВаритIан гирами вазарикан иллагьки Мугьяррам ушвар дисуз ужуб ваз ву".
Мугьяррам вазлиз Аьшурайин гирами йигъра дахил шула.
Мугьяррам ктучIву гунгьарин аьфв апIру ва Аллагьдиз ﷻ дюъйир апIру ваз ву. Ари гьаддиз гунгьарин аьфв апIру ва гъапIу ужувлаз гизаф ражари ужувлар тувру мумкинвал арайиан маадапIанай.
Гъит Аллагьу Тааьлайи ухьуз гьаму дюъйир ихласвалиинди, кIваъ рягьим ади, Аллагьу тааьлайик умуд кади ихь Агъайикан ккун апIуз тавфикьвал туври! Амин, я Мужиб!
