Уьмра фарз вуйинхъа?
Ассаламу аьлайкум, аьзиз мусурмнар. Гьаму бицlи макьалайиъ ихь саспи чвйирихьан гъюру уьмрайин гьякьнаан вуйи суалариз жаваб тувдихьа.
Варитlан гизафси гьерхру суал: уьмра фарз вуйинхъа? Ав, уьмра апlуз мумкинвал айи касдиз думу фарз шула. Ихь саспидарин гъалатlнан фикир шула, гьяж фарз ву, хъа уьмра дар кlури.
Фикир тувайки, фуну касдин гъийин йигъаз хулаъ 150 агъзур манат пул аш, думу касдиз уьмра апlуб фарз шула. Фуну касдин хулаъ 500-600 агъзур аш, думу касдиз гьяж тамам апlуб фарз шула.
Му ляхнариз дикъат фикир тувну ккунду. Саспидарин фикир шулуки, му гафар гьякь дар, сабан жвуван читинвалариз дилигну ккун, хъасин имбуб, кlури. Ав, читинваларизра дилигну ккун. Гъийин заманайи, жвуваз деуз хал, ляхниз гъягъюз машин дубхьну ккун, хъа дидлан зиина вуйибдихъ жвуван фарз тамам дапlну ккунду. Амма гизафдарин дици шуладар, жвуваз халра ади, ужуб машинра ади, дурари жвуван фарзарикан фикир апlурадар, хъа наан квартира гъадабгъуруш, наансана багьа машин гъадабгъуруш, хутларизра кмиди хал-йишв дивбакан фикрар апlуру.
Аьгъю апlинайки, Аллагьу Тааьлайи Гъиямат йигъан хутлариз гьаз дараматар дивундарва кlури гьисаб-суал апlидар, яв фарзар тамам гьаз гъапlундарва кlури, гьерхди. Гьадму йигъан фициб жаваб тувуйкlан?
Гьямд ибшри Аллагьу Тааьлайиз, гъийин заманайиъ ухьуз лап гизаф ниъматар тувна, гъазанмиш апlуз мумкинвалар тувна, улихь вахтарин гьякимаринтlан гъи аьдати касарин суфрайигъ гъяйиб артухъ ву. Му ниъматарихъан ухьу гьямд апlурайкlан? Му ниъматар ухьу фици ишлетмиш гъапlнуш, жаваб тувну ккун хьибди. Ав, жвувазра дубхьну ккун, багахьлуйиризра кюмек дапlну ккун, амма, сабпи нубатнаан, жвуван фарзар варитlан улихь духьну ккунидар ву.
Гьаддиз, аьзиз ватанагьлийир, гъачай сабан жвуван фарзар тамам апlурхьа, хъасин имбу ляхнар. Му жилиин ухьу хялар вухьа, сад йигъан му уьмур ккудубкlуру ва му ухьуз рякъюрайи леззетар кучlлиндар ву, эгер ухьу якьинди улар арццну гъилигиш, гьаци вуйиб рябкъюрира ву. Гьарсаб хизандиан му жилилан дурушу кас адар, ва гьадрари чпихьди фу хьади гъубхнуш, лигай. Гьадрари чпилантина гъибтуб саспидариз кlваиндикьан имдар. Гьаци хьибди ихьра, гьаму жилилан ухьу душну саб кьадар вахт арайиан гъубшган, вари ухьу гъапlуб, гъибтуб кlваълан гъябгъиди, хъа ухьухъди Аьхиратдиз вари ухьу гъапlу ужувлан ва чlуру ляхнар хьиди.
Гъит Аллагьу Тааьлайи ухьуз жвуван фарзар тамам апlуз, дурариз дикъатниинди фикир тувуз амур апlри. Гъит ихь гележег акуб ва Аллагьу Тааьла рази шлуб ибшри! Амин!
