Мистан хялар…

Мистан хялар…

Улихь нумрариъ ухьу Асккан Дагъни гъулаъ ачмиш гъапlу цlийи мисткан мялумат тувнийхьа. Му мист рякъюъ айидариз лап гъулайди шлу йишвахь ккабалгна. Гъит Аллагьу Тааьлайи гирами мистахъ зегьмет гъизигу гьарсар касдиз аьхю савабар дикIри.

Му мист ккебгъну кlулиз адабгъур Дагъни гъулан агьали ихь гьюрматлу Исмаил Аьгьмадов ва чан хизанар ву.

Му кас саб Табасарандиъ ваъ, хъа Мягьячгъалайиъра учв лихурайи йишваъ заан гьюрмат айи кас ву. Гьаддиз, магьа улихьнаси му касди жямяаьтдихъди сатlиди диву Аллагьдин ﷻ хулаз лигуз жюрбежюр хялар гъафнийи.

Дурарин арайиъ: ДГУ-йин онтологияйин ва теория познанияйин кафедрайин заведующий, профессор Билалов Мустафа Исаевич, ДГУ-йин доцент Айгул Залибековна, к.п.н., доцент, ДГПУ-йин педагогикайин психологияйин декан Пахрудин Шахбанович, к.п.н., доцент, ГПК-йин директор Алаудин Садитдинович.

Му ксар лап ужуйи ихь мист тикмиш гъапlу Исмаил халуйихъди танишди ву, фицики Исмаил Аьгьмадов ДГУ-йин онтологияйин ва теория познаниейин кафедрайин доцент, философия илмарин кандидат ву.

Табасаран райондин имам Ансар Рамазановди дуфнайи хялариз райондиъ жямяаьтлугъдихъди гъабхурайи ляхникан ктибтну.

Мустафа Исаевичди гирами Каламдин 30 джуз пешкешди тувну, хъа ГПК-йин директор Алаудин Аскеровди чан коллеждиъ урхурайи студентари гьязур гъапlу шикил мистаз пешкешди тувну.

Ихь Табасарандиъ тикмиш гъапlу мистаз гьамцдар ксари заан кьимат тувбан ва чпи гъапlу пешкешарин гъит Аллагьу Тааьлайи аьхю савабар дикIри. Гъит чпин уьмриъ хъанара аьхю хъуркьувалар ишри, ва ухьу вари Аллагьу Тааьлайин ужудар лукlарикан ишри.

Думутlанна гъайри, му делегация райондин глава М. Къурбановдихъди гюрюшмиш духьну, ихь халкьдиз мянфяаьт тувру асас месэлйирикан гъулхну.

Ихь варидарин терефнаан мистазра гьамциб фикир тувбан ва райондин главайихъдира гюрюшмиш духьну, ихь халкьдин арайиъ айи жюрбежюр месэлйирикан улхбан дурариз аьхю чухсагъул кlурача.