Женнетдин вари раккнарихъна теклиф апIру инсанар
Женнетдин вари раккнарихъна теклиф апIру инсанар
Женнетдин вари раккнарихъна теклиф апIру инсанар
Аллагьу Тааьлайи Чан амрар тамам апIру ксариз женнет кьисмат дапIна. Гьаму жилилан Аллагьу Тааьлайихъ кIваантIан хъугъну гъушу касдиз женнет хьибди, гьеле дугъкан гунгьар ктучIвури гъахьнушра.
Эгер Аллагьу Тааьлайи гунгьар кади гъушу мусурмнариз Чан рягьимлувал улулупиш, дурари чпин аьзаб гъадабгъну, хъасин женнетдизди учIвди. Хъа ужувлан ляхнар чIуру ляхнартIан артухъ гъахьи инсанар саб жюрейинра читинвал адарди женнетдиз гъягъиди.
Амма гьаму жюре муъминарин арайиъра женнетдиз жюрбежюр раккнариан учIвру инсанар хьиди, чпи му жилиин гьапIри гъахьнуш, фицдар ляхнар апIури гъахьнуш, гьадилан асиллу ву.
Аьлимари Пайгъамбарин ﷺ гафариз тялукь духьну женнетдиз 8 раккин а, кIура. Думу раккнарикан гьарсаб жюрбежюр ибадатар апIури гъахьи муъминариз ву.
Абу Гьурайрайи Пайгъамбарин ﷺ гафар хура:
لِكُلِّ أَهْلِ عَمَلٍ بَابٌ مِنْ أَبْوَابِ الْجَنَّةِ، يُدْعَوْنَ مِنْهُ بِذَلِكَ الْعَمَلِ، وَلِأَهْلِ الصِّيَامِ بَابٌ يُدْعَوْنَ مِنْهُ، يُقَالُ لَهُ: الرَّيَّانُ ، فَقَالَ أَبُو بَكْرٍ: يَا رَسُولَ اللهِ، هَلْ أَحَدٌ يُدْعَى مِنْ تِلْكَ الْأَبْوَابِ كُلِّهَا، قَالَ: نَعَمْ، وَأَنَا أَرْجُو أَنْ تَكُونَ مِنْهُمْ يَا أَبَا بَكْرٍ
«Гьарсаб жюрейин ибадат гъапIдариз жа-жаради женнетдин ракннар а, ва гьадму раккнариан гьадму жюре ибадатнан ччвур кIури, дурариз дих апIиди. Ушв гъибисдаризра а гьацдар раккнар ва дурарин ччвур “Ар-Раййан” ву».
Му гъеебхьган Абу Бакри гъапну: «Я Расулаллагь! Гьаму вари раккнариан дих апIру кас шуйкIан?» Пайгъамбари ﷺ гъапну: «Ав, уву гьадрарин арайиан шул, кIури миж кивраза». (Имам Аьгьмад, 9800)
Абу Гьурайрайи, имам Бухарийи, Муслимди ва жара мугьяддисари ктибтурайи гьаму гьядисдин жара риваятнаъ гьамци дупна, Пайгъамбари ﷺ гъапну:
«Аллагьу Тааьлайин рякъюъ кьюб мутму харж гъапIу касди женнетдиан дих апIиди: “Эй Аллагьдин ﷻ лукI! Му уж’вал ву!” Гъудган гъапIдариз гъудгнин раккнариан дих апIиди, жигьаддиъ иштирак гъахьидар - жигьаддин раккнариан, ушв гъибисдариз - «Ар-Раян» раккнариан, хъа садакьа тувдариз садакьайин раккнариан дих апIиди».
Му гафар гъеерхьган, Абу Бакри гъапну: «Йиз абйир-бабариинди кIураза, я Расулаллагь! Му раккнариан дих гъапIдарин саб фтиъкIа мюгьтаж’вал хьибдар, хъа вари раккнариан дих апIру ксар шуйкIан?» Пайгъамбари ﷺ гъапну: «Ав, шулу. Узу умуд кивраза, дурарин арайиан увура шул кIури». (Бухари, 1897; Муслим 1027; Тирмизи, 3674)
Шейх аль-Ислям Ибн Гьяжар Аль-Аскьаляни чан «Фатгь аль-Бари шаргь Сагьигь аль-Бухари» китабдиъ, му гьядисдин мяна туври, гьамци дупна:
«Гьаму гьядисдин мянайиан хъанара мянфяаьтлу ляхнар удучIвура:
- саб жюрейин ибадат артухъдиси апIру кас гьадму ибадатниинди аьгъю шулу;
- вари ужувлан ляхнар сабси кми-кмиди апIуз шулдар;
- ужудар инсанар малаикариз ккунидар ву ва дурар рази шулу;
- инсанди ужувлан ляхнариъ фукьан артухъ харж гъапIиш, гьадмукьан ужи ву;
- муъмин касди чаз гьаму жилиинра ахиратдиъра ужувлар ккун дапIну ккунду».
Имам Ан-Нававийи чан «Аль-Мингьаж Шаргь Сагьигь Муслим ибн Аль-Гьяжаж» китабдиъ му гьядисдиз мяна туври гьацира дибикIна:
«Пайгъамбари ﷺ инсанариз женнетдин гьамцдар раккнариан дих апIиди кIуруган, кIваин гъапIну анжагъ гъудгнин, садакьайин, ушварин ва жигьаддин раккнар. Аль-Кьазийи гъапну, тубайикан вуйи кIулиъ ктибтурайи гьядисдиъ хъанара миржидар раккнарикан шубударин гьякьнаан кIура: хъял кайиган сабур гъапIдарин гьякьнаан, тмунуриз аьфв гъапIдарикан ва жвуван ризкьниин разиди вуйидарин гьякьнаан. Гьаму шубубсан кIваин гъапIган, 7 раккникан гъапиб гьисаб шула.
Сабсана гьядисдиъ 70 агъзур касдикан, дурар саб гьисаб-суалра адарди женнетдиъ хьиди кIури дупна ва гьадуваъ дурар «Аль-Айман» кIуру раккнарианмина учIвди дупна - дурар миржибпи раккнар вушул».
Уьмар иб Хаттабди Пайгъамбарин ﷺ гафар хура:
مَا مِنْكُمْ مِنْ أَحَدٍ يَتَوَضَّأُ فَيُبْلِغُ - أَوْ فَيُسْبِغُ - الْوُضُوءَ، ثُمَّ يَقُولُ: أَشْهَدُ أَنْ لَا إِلَهَ إِلَّا اللهُ وَأَنَّ مُحَمَّدًا عَبْدُ اللهِ وَرَسُولُهُ إِلَّا فُتِحَتْ لَهُ أَبْوَابُ الْجَنَّةِ الثَّمَانِيَةُ يَدْخُلُ مِنْ أَيِّهَا شَاءَ
«Учвкан шликIа тамамди гъудгнин дижикIну, хъасин: “Ашhаду алля иляhа илля-Ллаhу вагьда-hу ля шарика ля-hу ва ашhаду анна Мугьяммадан аьбду-hу ва расулю-hу ”, – гъапиш, дугъаз женнетдин вари миржби раккнар тIаъди ва думу дурарикан чаз ккунибдиан учIвди». (Муслим, 234; Абу Дауд, 169; Ибн Мажагь, 470)
Тирмизийихьан вуйи риваятдиъ Пайгъамбари ﷺ гъапну:
اللَّهُمَّ اجْعَلْنِي مِنَ التَّوَّابِينَ، وَاجْعَلْنِي مِنَ المُتَطَهِّرِينَ
«Аллаhумма-жаьльни мин ат-таввабина ва-жаьльни мин аль-мутатIаhhирина (я Аллагь, узу туба апIрударикан ва марцциди шлударикан апIин)». (Тирмизи, 55)
Гьаму гьядисдин гьякьнаан шейх аль-Ислям Ибн Гьяжар Аль-Аскьалянийи чан «Фатгь аль-Бари шаргь Сагьигь аль-Бухари» китабдиъ гьамци дибикIна:
«Имам Муслимди Уьмар ибн ХатIабдихьан хурайи гьядисдин гьякьнаан кIуруш: «Тамамди гъудгнин дижикIну, “Ашhаду алля иляhа илля-Ллаh…”, гъапи касдин улихь вари миржби женнатарин раккнар ачухъ апIиди ва дурарикан чаз ккунибиан женнетдизди учIвди» му гьядисдин имам Муслимди хурайи жара гьядисариз гъаншарвалин мяна адар, гьеле саспидарин гьаци фикир хьузра мумкин ву…».
Зиихъ дупнайибдиан гъаври шулаки, эгер сар касди артухъдиси саб жюре ибадатнан тамам апIури гъахьиш, гьадму лишнар кайи агьлар учIвру раккнарианмина думу учIвди.
Хъа вари раккнарианмина инсандиз женнетдиз дих апIбиинди инсандихьна асас гьюрмат айивал улупура. Гьамдиан аьгъю шулаки, дицир кас вари жюрейин ибадатар заан дережайиинди тамам апIрур хьиди.
Гъит Аллагьу Тааьлайи му ибадатар ухьуз заан дережайиинди тамам апIуз тавфикь туври.
