Рамазандин вазлин кьяляхъ Шаввалин ваз ккебгъру
Шавваль вазли дисру ушварикан
Шаввалин ваз Рамазан вазлин кьяляхъ гъюру ваз ву. 1-пи Шавваль машквран йигъ шулу. Му йигъан ушв бисуб гьярам дапIна. Хъа му йигъхъантина вуйи 6 йигъандин арайиъ ушвар дисуб лап ижми сунна ву.
Саб вазли ушвар дидисну машквран кьяляхъ хъанара ушвар дисувалин гьикмат фициб ву? Гьикматар гизаф а. Дурарикан саб, вазлин арайиъ ушвар гъидисдарин хурагнахьна ужуб иштагьвал ади шулу, ва му саягънаъди ушвар дисувал хъана давам апIуб нефсназ гъагъи ляхин ву. Гьаци вуйиган, Аллагьдиз ﷻ табигъ духьну, чан нефсназ къаршу гъахьиш, мидин савабра аьхюб шулу. Саб ваз Рамазандин ва 6 ушв Шаввалинра гьисаб гъапIган, 36 ушв шулу. Абу Аюб аль-Ансарийихьан вуйи гьядисдиъ дупна: «Шли Рамазандин вазлиъ ушвар гъидиснуш ва хъасин шавваль вазликанра 6 ушв гъибиснуш, думу касдиз вари йисан ушвар гъидисгансиб саваб шулу» (Муслим).
Хъа эгер Рамазандикан ва Шавваликан дарди, жара вазариъ 36 ушв гъидисиш, сад йисан гъидисгансиб саваб шулин? «Бужайрами» китабдиъ дибикIна: "Эгер Рамазандин вазлиъ ушв гъибисиш, хъасин шаввалиъра - 6 ушв, сад йисан фарз ушвар гъидисгансиб саваб шулу. Эгер 36 йигъан Рамазандикан ва Шавваликан дарди гъидисиш, думуган сад йисан суннат ушвар гъидисубсиб саваб шулу".
Суал: Рамазандин вазли ушвар дидрису касдиз Шаввалин суннат ушвар дисуз хай шулин? Му суалназ аьлимари гьамциб жаваб тувра: «Эгер дугъу ушвар саб себеб ади гъидисундарш, дугъаз Шаввалин ушвар дисуб суннат ву, амма дугъаз вари йисан гъидисгансиб саваб хьибдар. Хъа эгер дугъу саб себебра адарди Рамазандин вазлин ушвар ккадаънуш, дугъаз Шаввалин вазлин суннат ушвар дисуб гьярам ву, гьаз гъапиш сифте дугъу саб себебра адарди ккадау ушвар кьан дарапIди кьаза дапIну ккунду.
Шаввалин вазли ушвар чпи-чпихъди хъирчну даршра дисуш шулу, амма, машквар йигъхъан хъюгъну, 6 ушв сатIиди дисуб ужи ву. Шаввалин ваз ккудубкIиган, му суннайин вахтра ккудубкIуру. Гьаци вушра, Шавваль вазлин кьяляхъра му суннатар кьаза апIуб ужи ву. «Бужайрамийиъ» дибикIнаки, эгер гьаму суннат ушварихъанди фарз-кьаза апIру ушвар дисури гъахьишра, Шаввалин суннат ушварин саваб шулу.
Гъит Аллагьди ﷻ му суннайихъан ижмиди хъчIихуз ухьуз тавфикь туври! Амин!
