Куркак гъулаъ цlийи мист

Куркак гъулаъ цlийи мист

Ассаламу алейкум, аьзиз ватанагьлийир! Ихь багъри Табасаран гьарсарин кlваз мани ва гюрчег йишв ву. Му юрдарин хьадукран чрушин арайиз гъюрайи вахтнан утканвал гафариинди пуз шлуб дар. Гьадмукьан гюрчегди ву.

Му утканвалихьна ихь юрдариъ Аллагьу Тааьлайин жилиин али сабсана хал ачмиш апlруган, кlваз хъанара артухъди хуш шулу.

Магьа 13-пи апрели Табасаран райондин Куркак гъулаъ уткан мист ачмиш гъапlну.

Улхьан йигъантlанмина вари гъул-жямяаьт уч духьну, чпин хулаз жюрбежюр йишвариан инсанар гъювалихьна гьязур шулайи. Дупну ккундуки, гъул бицlиб вушра, жямяаьтди заан дережайиинди хялар кьабул гъапlну.

Магьа гвачlнин сяаьт урчlвубдихъан хъюгъну, жюрбежюр йишвариан хялар гъюз хъюгъю. Сифте жямяаьтди дуфнайи хяларихь гьязур дапlнайи хурагнакан бисми апlуз гъиту, хъасин вари цlийи мистаз уч хьуз хъюгъю.

Гьямд ибшри Аллагьу Тааьлайиз, мициб мист му бицlи гъулаъ тикмиш апlуз мумкинвал тувбан.

Куркак жямяаьтдин мист апlури улихь хьайи Низамутдин халуйи уч духьнайидариз варидариз чухсагъул къайд гъапlну.

«Гьюрматлу гъуландар ва дуфнайи хялар! Магьа гъи вари цlийи мистаз уч духьнахьа. Му мистахъ гъуландари аьхю зегьмет гъизигну, варидарин ччвурар ктухуз шулдар, варидариз кlваантlан чухсагъул кlураза. Думутlанна гъайри, гьаму мист ккебгъуз ва кlулиз адабгъуз кюмек гъахьир ихь райондин имам Ансар-гьяжи ву. Гъит Аллагьу Тааьлайи гьамци ихь жямяаьт бадали зегьмет зигбан му касдиз аьхю савабар дикIри», - гъапну Низамутдин халуйи.

Мажлис кlули гъабхурайир Табасаран райондин дяъват отделин гъуллугъчи Аьгьмад Сеферов вуйи.

Уч духьнайидарин улихь улхури, Дагъустандин Муфтиятдин Кьибла терефнаъ айи вакил Гьюсейн Гьяжиевди гъапну: «Гьюрматлу табасаран халкь! Дугъриданна, гьар ражари му юрдариз гъюз юкlв шулу, гьаз гъапиш мушваъ яшамиш шулайидар ужудар агьлар ву. Му цlийи мистра мубарак ибшри, учвуз мушваъ ибадат апlуз хъуркьувалар ишри».

Гьюсейн Гьяжиевди Муфтиятдин терефнаан мистаз пешкешра тувну.

Гъулан глава Рамазан Казимовди жямяаьт кlваантlан тебрик гъапlну. «Магьа ихь советдик кахьрайи гьарсаб гъулаъ цlийи мистар тикмиш дапlна. Му ухьуз аьхю шадвал ву», - гъапну Рамазан Казимовди.

Гъунши гъулан имам Гьясаняли халуйи уч духьнайидарин улихьна аьлимарихъ хъпехъну ккуниваликан, гъудгнин вахтарикан ва жюрбежюр жара ляхнарикан яркьуди ктибтну.

Табасаран райондин имам Ансар Рамазановди чан улхбаъ гьамци гъапну: «Гьюрматлу Куркак жямяаьт ва дуфнайи хялар. Гъи му гъул-жямяаьтдиз ва вари ихь Табасарандиз аьхю шадвалин йигъ ву. Гьямд ибшри Алллагьу Тааьлайиз ухьуз гьамци мист ачмиш апlуз мумкинвал тувбаз. Му инсанари чухсагъул кlуру ва Аллагьу Тааьла рази шлу ляхнарикан ву. Му мист фици тикмиш гъапlнуш аьгъязуз, фицики сабпи йигъланмина гъийин йигъазкьан гьарган илдицури, жвувхьан шлу кюмек апlури гъахьунза. Гъит гьарсар касдин туву садакьа, гъизигу зегьмет заан дережайиинди кьабул апlри. Му бицlи гъулаъ гьамциб дарамат дивуб заан ляхнарикан ву».

Му мажлиснаъ Ансар Рамазановди гьацира, Ислам диндиъ жвуван улихь хьайи имам, аьлим касдихъди гъягъювализ асас фикир тувра, гъапну ва яркьуди думу ляхникан ктибтну. Думутlанна гъайри ихь халкьдин арайиъ айи саспи учlру месэлйириканра гъулхну.

Улхбарин арайиъ ихь имамари мавлидар-назмар гъурхну.

Мажлиснан аьхириъ Ансар Рамазановди мист апlурайган асас кюмек туву ксариз пешкешар тувну.

Мажлис варидари дюаь апlбиинди ккудубкlну. Гъит Аллагьу Тааьлайи Куркак жямяаьтдиз му мистаъ артухъди ибадат апlуз кюмек туври! Амин!

Ильгиз Салаватов