Аьлимарин насигьат

Аьлимарин насигьат

Гьямд ибшри Аллагьдиз ﷻ , салават ва салам Пайгъамбариина ﷺ , дугъан хизандиина ва асгьябариина! Гъит Аллагьди ﷻ ухьу вари Чаз ккунибдиин ва Учв рази шлубдиин алаъри!

Гьаму цIарар ихь аьлимари ухьуз гъиту насигьятнан гафариз бахш апIурухьа. Магьа дурар: - Яв аьмал ва юкIв чIур апIрударихьан ярхла йихь. Дугъриданна, дюн’яйихъ хъергнайидарихъди, тямягькрарихъди, чпин мал-мутму Аллагьдин ﷻ рякъюъ харж дарапIру шейтIнин гъардшарихъди вахт адапIувалиан юкIв чIур шулу; - Яв дин чIур апIрударихьан ярхла йихь. Дугъриданна, гизаф мянфяаьт ктру гафар апIрударихъди яв дин дусбаан уву чIур шулу;

- Яв уьмриз вуйи алатар, дармнар-себебар чIур апIрурихьан ярхла йихь. Дугъриданна, дурар тямягькарвалиан, чпин шагьватIнахъди гъягъювалиан шулу; - ЧIуру инсанарихьан ярхла йихь. Ужудар ксарихъдитIан дуствал мапIан. Яв ипIрубра гьялал ибшри. ЧIуру ксарихъди дуствал гъабхурайидарихъди дуствал мапIан, яв жини ляхнарикан дурариз хабар мутуван, дурарин машнаъ мяаьлхъян. Мушваъ дупнайибдихъди гъягъюри гъахьиш, гизаф рягьят хьибдивуз;

- СултIандин раккнарихьан ярхла йихь, яни гьякимарин, девлету ксарин, дюн’яйихъ хъергнайидарин, ва дицдарихьна гъягърударихьанна ярхла йихь: дурарин футна Даджалин футнасиб ву; - Гунгьарихьан ярхла йихь. Аллагьу Тааьлайи Адам ﷺ заан гъапIну, Дугъаз сужда апIуз Малаикариз амур гъапIну, ва думу Женнетдиъ гъахьну. Амма дугъу гъапIу саб ляхниан думу Женнетдиан адаъну. Гунгьар апIруган, Аллагьдиз ﷻ хъял гъюру, гунгьарихьан ярхла йихь;

- Жагьиларин ва чIуру ксарин дестйир ккун мапIан, дурарихъди дуствал апIбахьан ярхла йихь, гьаз гъипиш дурарихъди дуствал гъабхрур азад хьидар; - Инсанарин арайиъ айиган, машнаъ инчI ади, хушди йихь, хъа фужкIа багахь хьтруган, гизаф ирккну, пашманди йихь. Ухьуз аьгъюбдиан, муъмин касдиз Гъиямат йигъан чаз дибикIнайибдик варитIан артухъ ужувлар жвуву гъапIу гунагь ляхнариин жвув пашман хьувалиан шулу; - Жарари уткан гафариинди дамагъ апIураш, уву уткан ккебехъувалиинди дамагъ апIин; - Жунайд аль-Багъдадийи гъапну: «Инсандиз илмарикан цIибтIан хабар адаршра, юкьуб ляхни думу заан дережайиз адауру: 1) гъюдливали; 2) разивали, сикинвали; 3) жумартвали; 4) уткан хасиятну» (Файзу альКьадир, №3\115);

- Нефсдиз варитIан читниб русвагьвал ву; - ДапIну ккуни ляхин жара вахтназ гъибтуб – шейтIниз раккнар ву; - Агьмад ар-Рифаийи гъапну: «Фикир апIуб – фикрин нур ву, ихласвал – жинивалин нур ву, Аллагьдихьан ﷻ гучIрувал – машнан нур ву»; - Аьгьмад ар-Рифаийи гьацира гъапну: «Пайгъамбариина ﷺ салават хували СиратI гъядлан гъягъюб рягьят апIиди ва апIурайи дюаь кьабул апIруб хьибди; эгер шулуш, садакьа тувай, диди жегьеннемдин цIа мичIал апIуру ва Аллагьдин ﷻ хъял ярхла апIуру. Абйир-бабариз уж’вал апIували кечмиш шулайи вахтнан аьзаб пчIу апIуру»; - Дугъу гьацира гъапну: «Бахилвалихьан ярхла йихь, дугъриданна, бахилвал вари гъалатIарин баб ву. КучIал ва бахилвал лукI Аллагьдихьан ﷻ ярхла хьпаз себеб вуди шулу».

ГЬЯЖИМУРАД УЬМЯРГЬЯЖИЕВ