Гомрәгә – бөтен авыл белән

Казанга изге җирләрдән – Мәккә һәм Мәдинәдән үзенчәлекле хаҗилар төркеме кайтып төште: республика тарихында беренче тапкыр кече хаҗга (гомрәгә) бер авылдан берьюлы 26 кеше барды. Төркем тулысынча Балык Бистәсе районының Балтач авылында яшәүчеләрдән тора. Алар белән бергә авылдашларының мөһим сәфәргә чыгуына сәбәпче булган авыл имамы Фердинанд хәзрәт Хәкимов та китте. Сәфәргә чыгар алдыннан, авыл кешеләре якташларын кунакчыллык күрсәтеп озатып калды, хәтта, хәлләреннән килгәнчә, акчалата ярдәм дә итте. Кече хаҗ кылучылар арасында махсус хәрби операциядә уллары Рәсүлне югалткан Алсу һәм Рөстәм Вафиннар да бар иде.

Әлеге төркем гомрәгә Балык Бистәсе районы имам-мөхтәсибе Рамазан хәзрәт Хисаметдинов җитәкчелегендә барды. Йолаларны үтәү хәнәфи мәзһәбенә нигезләнеп оештырылды. Мәдинәдә балтачлылар Мөхәммәд Пәйгамбәр ﷺ мәчете янындагы кунакханәдә тукталды. Ә Мәккәдә Әл-Хәрам мәчетеннән ерак булмаган дүрт йолдызлы кунакханәдә яшәде. Гомрә йолаларын үтәүдән тыш, алар истәлекле урыннарда: Пәйгамбәр ﷺ каберендә, Раудада, Куба һәм ике Кыйбла мәчетләрендә, Үхүд тавында, бакчада, Әл-Бакый зиратында, Нур тавында, Мөхәммәд Пәйгамбәргә ﷺ вәхи килгән урында, Хира мәгарәсендә, һиҗрәт вакытында мөшрикләрдән качып торган Саур мәгарәсендә, шулай ук хаҗ кылу урыннарында, мәсәлән, Гарәфә, Рәхмәт тавында, Җәмәратта (таш ату), Минада һәм Мөздәлифәдә булды.