СӘЛАМӘТ БУЛЫЙК!
Зәм-зәм суы: ризык һәм дәва
Җир йөзендә зәм-зәм суыннан да чистарак башка су юк. Аллаһы Тәгалә чүл уртасында бер дә туктамый ага торган су чыганагы хасил иткән. Хаҗ кылучы мөселманнар зәм-зәм суы эчеп тәннәрен сихәтләндерәләр. Пәйгамбәребез Мөхәммәд галәйһиссәләм үзенең бер хәдисендә зәм-зәм суын ризыкка тиң туклыклы һәм күп чирләрдән дәва, дип тасвирлый. Хәзерге чор фәнни ачышларда әлеге суның үзенчәлекле сыйфатлары тәгаенләп ачылып бирелде.
Доктор Әхмәт әл-Мөхәндис бер хезмәтендә болай дип белдергән: «Зәм-зәм — иң чиста су. Моны Бөтендөнья сәламәтлекне саклау оешмасы да исбатлады».
Доктор әйткәнчә, зәм-зәм суына ясалган фәнни анализ шуны күрсәтә: әлеге су искиткеч саф, төссез һәм үзенә генә хас хуш исле. Аның составында түбәндәге химик элементлар бар: тимер, марганец, бакыр, кальций, магний, хлоридлар, сульфатлар. Тагын шунысы әһәмиятле: кайбер элементлар нәкъ кирәгенчә аз күләмдә икән.
Пәйгамбәребез галәйһиссәләм медицинасында зәм-зәм суы белән дәвалау хакында да хәбәрләр бар. Ибн Гәббәс (аннан Аллаһ разый булсын) хәбәр иткәнчә, Мөхәммәд Пәйгамбәребез галәйһиссәләм болай дигән: «Зәм-зәм суын эчүче кеше аны ни өчен эчсә, шуны алыр». Икенче бер хәдистә түбәндәгечә әйтелгән: «Җир йөзендә иң яхшы су — зәм-зәм суы. Ул тәмле дә, күп чирләрдән дәва да». Шулай ук Пәйгамбәребезнең галәйһиссәләм авырулар янына барганда Зәм-зәм суын алуы һәм аларга әлеге суны эчертүе яки зәм-зәм белән өсләреннән бөркүе мәгълүм.
Бер сәхабә әйткән: «Мин 30 көн һәм төн зәм-зәм суыннан башка берни эчмәдем һәм ашамадым. Әмма ачыгу хисе булмады, хәтта тагын да тазарып киттем».
«Пәйгамбәр медицинасы» дигән китапның авторы Ибн әль-Каййим (аңа Аллаһының рәхмәте булсын) әйткән: «Башка кешеләр кебек мин дә Зәм-зәм суы белән дәваланып карадым һәм искиткеч нәтиҗәләргә ирештем. Зәм-зәм суын ала идем һәм аның өстенә берничә тапкыр «Фатиха» сүрәсен укый идем һәм ошбу өшкерелгән суны эчә идем. Ошбу ысулны мин бик еш куллана идем һәм Аллаһының Рәхмәте белән бик күп авырулардан сихәтләнә идем».
Соңгы фәнни ачышлар суның катлаулы динамик структура икәнен күрсәтте. Һәр тышкы тәэсир сәбәпле аның стационар хәләте, структурасы, төзелеше үзгәрә икән. Суның сыйфатына, хәтта фикерләү дә тәэсир итүе ачыкланды. Мәшһүр япон галиме Масару Эмото нанотехнология ысуллары кулланып су белән фәнни тикшеренүләр уздырган. Сүгенү, рок музыка тәэсир иткән суны катырган һәм бик ямьсез боз ярчыкларын (осколок) күргән. Ә дога укыган судан катырылган боз бик матур, төрле катлаулы кар бөртекләре кебек форма алган.
Масару Эмото Сагуд Гарәбстанында фәнни симпозиумда булган һәм бик күп галимнәр алдында зәмзәм суы белән дә тәҗрибәләр ясаган һәм зәм-зәм суының сыйфатларын үзгәртеп булмавын ачыклаган. Шул ук вакытта 1 тамчы зәм-зәм 1000 тамчы гади суга өстәлсә, гади су зәм-зәм суы сыйфатларына ия булуын исбатлаган.
Зәм-зәм суы өстендә бисмилләһ, Аллаһ Тәгаләнең исем-сыйфатлары, Коръән аятьләре укылса һәм бу су катырылса, ул гаҗәеп матур кристалларга әверелә.
Масаро Эмотоның Интернетта үз сайты бар. Бу сайтта зәм-зәм суына һәм гади суга бисмилләһ сүзенең, Коръән аятьләренең тәэсире тасвирлана.
Бу фәнни ачышлар Ислам динебездәге гыйбадәтләрнең кеше организмына уңай тәэсир итүенә, Аллаһның чиксез рәхмәтенә тагын бер дәлил булып тора. Кешенең 70 проценты судан тора бит. Мөселман дога, Коръәни-Кәрим аятьләрен, намазлар укып Аллаһы Тәгаләнең ризалыгына ирешә һәм үз-үзен өшкереп тәнен сихәтләндерә. Әлхәмдулилләһ! Аллаһу Әкбар!
Интернет сайтларда, мәгълү-мат чараларында дөньяви медицина ысуллары көчсез булган вакытта бик күп төрле авыруларны, хәтта яман шешне Зәм-зәм суы белән нәтиҗәле дәвалау очраклары хакында хәбәр ителә.
Тик шуны күздә тотарга кирәк. Зәм-зәм суы белән дәваланганда өч шарт үтәлергә тиеш:
Зәм-зәмне эчүче Аллаһ Тәгаләгә ышанырга тиеш;
Аңа тәвәккәл кылырга;
Һәм аны Аллаһ Тәгалә сихәтләндерүенә шиксез инанырга тиеш.
Зәм-зәм суы озак саклана, бик озак савытта торса да, үз сыйфатларын югалтмый, бозылмый. Хаҗ сәфәренә барган мөселман кардәшләребез Зәм-зәм суын ерак җирләрдән алып кайталар, һәм аның белән башкаларны сыйлыйлар. Ниятләренә карап, бу суны эчүчеләр аның файдасын табалар.
