АЛЛАҺНЫ ЗИКЕР ИТҮ

АЛЛАҺНЫ ЗИКЕР ИТҮ

«Сүбхәналлаһ», «Әлхәмдүлилләһ», «Аллаһү әкбәр», «Сүбхәналлаһи вә бихәмдиһ, сүбхәналлаһил-газыйм» дигән зикер сүзләрен кабатлап, «Әстәгъфируллаһ» дип истигъфар кылып, өйгә кергәндә, өйдән чыкканда, иртән һәм кичен һәм башка очракларда әйтелә торган махсус догаларны әйтеп йөрүнең һич кыенлыгы юк. Аллаһны зикер итеп йөргән кеше бу дөньяда да, Ахирәттә дә олы әҗер-савапларга ирешәчәк.

Аллаһны еш искә алу – Аны яратуның билгесе

Хәбәр ителүенчә, бер кеше Аллаһның Илчесеннән галәйһиссәләм:

– Намаз укучыларның кайсысы иң зур әҗер-савапка ирешә? – дип сораган.

– Аллаһ Тәгаләне иң күп зикер иткәне, – дигән Аллаһ Илчесе галәйһиссәлам.

– Ә ураза тотучыларның кайсысы иң зур әҗер-савапка ирешә?

– Аллаһ Тәгаләне иң күп зикер иткәне.

Шуннан бу кеше зәкать, хаҗ һәм сәдака турында сораган. Аларның һәрберсенә Аллаһ Илчесе галәйһиссәлам:

– Аллаһ Тәгаләне иң күп зикер иткәне, – дип җавап биргән.

Моны ишетеп торган Әбү Бәкер Гомәргә (Аллаһ алардан риза булсын):

– И Әбү Хәфс, Аллаһны зикер итүчеләр бөтен әҗер-савапка ия була икән, – дигән.

– Әлбәттә! – дигән Аллаһның Илчесе галәйһиссәлам