Зуль-кьаъда зурул хасшиву
Шаввал зурул хъирив бусурманнал календарьданий най бур Зуль-кьаъда тIисса барз. Ва зуруй бучIиссар ХIаж баву дайдишин. Аллагь Тааьланал увкуну бур Кьуръандалуву: «ХIаж бувайссар мяълумсса зурдардий (Шаввал, Зуль-кьаъда ва Зул-ХIижжа зурул цалчинми ацIва гьантта)» («Аль-Бакьара» суралул 197-мур аят).
ХIаж баву Заннал бусурманнай ялув бивхьуну бушиву буслай бур «Али Эмран» тIисса суралул 97-мур аятраву (мяъна): «…Халкьуннай ялув бивхьуссар БайтуллагьрачIан (КяъбалучIан) ХIаж баву, миккунсса ххуллу битансса кьудрат дусса бухьурча», - куну. Кьудрат душиврувун духлахиссар ххуллунхарж (арцу), чурххал цIуллушиву ва мурахасъсса ххуллу бикIаву.
МухIаммад Идавсил ﷺ цалва оьрмулуву ХIаж дахьва цалли бувсса, Мадиналив ялапар хъанахъисса чIумал, гьижралул 10-ку шинал. Мунийн учайссар «ХIаджжатуль-вадаъ» («махъва-махъсса ХIаж»).
ЧIивимур ХIаж (Оьмра) тIурча, чIявуми хIадисирттал тасттикь буллай бур Идавсил ﷺ му мукьилва бувшиву. Цалчинмур – «худайбиялул Оьмра», гьижралул 6-ку шинал. Маккаллал мушриктурал Идавс ﷺ ва ганащалми къабивтссар му Оьмра буван. Гайннан махъунмай зана бикIан багьссар. Хъиривмур шинал Идавсил ﷺ «хъирив лахъаврил Оьмра» бувну, ларгсса шинал буван къавхьумур хъирив лахъан бувссар. Мунил хъиривсса шиналгу Идавсил ﷺ цалва асхIабтуращал бувссар «Джираналувасса Оьмра» (Джирана тIисса кIану буссар Маккаллал ва ТIаиф шагьрулул дянив). Мукьилчинсса Оьмрагу Идавсил ﷺ бувссар ХIаж буллалисса чIумал, ганищал архIал, Гьижралул 10-ку шинал.
Зуль-кьаъда зурул хасшивурттавасса ца – Идавсил ﷺ цалчинми шанма Оьмра ва зуруйри бувсса. Махъва-махъсса Оьмралувунгу МухIаммад Идавс ﷺ увхссар Зуль-кьаъда зуруву, амма цуппа щаллу бувссар Зул-ХIижжа зуруй, ХIаж буллалисса чIумал. Мунин бувну, хьхичIвасса салафу-ссалихIинтурал, хаснува Ибну Оьмардул, муъминтурал нину Аьишатлул ва цайминналгу Зуль-кьаъда зуруй Оьмра баву хъинсса, чири ва барачат гьарзасса, цайми зурдардиву бувмунияр даража лахъсса давуну ккалли бувссар, сайки Рамазан зуруй бувмунияргу.
Кьуръандалуву увкуну бур (мяъна): «Муса Идавсин ﷺ ккаккан бувссар зувива гьантта (Заннащал ихтилат булланнин ва Таврат булуннин эбадат дуллай гьан бувансса), яла гайннул ялун ацIва гьантта ххи бувссар» («Аль-Аъраф» суралул 142-мур аят). Цаппара аьлимтурал тIимунин бувну, ва аятраву кIицI лавгсса 30 гьантта – Зуль-кьаъда барзри, ялун ххи бувсса ацIвагу – Зул-ХIижжа зурул хьхьичIсса ацIва гьанттар.
Вай мубараксса зурдардил барачат жуйнма цинявннайн бияннав, Аллагьнал КъатлучIан ХIаж бувансса каши-кьудратгу гьарза даннав. Амин.
