Хъинсса тIул-тIабиаьтраясса калимарду

Хъинсса тIул-тIабиаьтран хас бувну буссар тамансса, мусил багьасса махъру. Шикку чичинну миннувасса цаппара, гъафлатравун дахьларгсса дакIру кIукIлу хьуну, хъинсса тIуллу дуллан кIункIу дуваншиврул:

1. МухIаммад Идавсихь ﷺ цIувххуссар: «Бусурманнава цала диндалуву яла узданма цумари?» - куну. «Яла ххуйма – ххуйсса хасият думари!» - дуллуссар жаваб. Ялагу цIувххуну бивкIссар: «Алши бакъашиву цири?» - куну. «Оьккисса хасият», - увкуссар Идавсил ﷺ.
2. Расулуллагьнал ﷺ увкуссар: «Зула хъуслия цадакьа бувансса каши дакъахьурча, халкьуннащал дакI тIиртIуну, хъинну бикIияра».
3. Ца чIумал Идавсихь ﷺ увкуну бивкIссар: «Я Аллагьнал Идавс ﷺ! Заннахь дуаь дува мушриктуран танмихI бува увкуну!». Мунин укунсса жаваб дуллуссар: «На цIимилун гьан увссара, танмихIран гьан къаувссара».
4. Фузайллул увкуссар: «Инсан чIявусса хъинбаларду буллай унува, цалва ичIувсса аьнакIущал хъинну акъахьурча, му салихIсса инсанну ккалли уван къабучIиссар».
5. Увкуну бур: «Хъинсса хасият – цала дуллалисса эбадат чIирину чIалай, Заннал цанма буллусса неъматру хъун бавури».
6. Шагь аль-Карманил увкуссар: «Инсаншиврул лишан – цайминнан зарал баврия махъунай шаву ва гайнная винна диллалисса захIмашивуртту духIаву».
7. Вагьблул увкуну бур: «Мукьцалва гьантлий ца хъинсса аьмалданий даин хьусса инсаннан му аьмал хасиятравун буххантIиссар».
8. «Вила яннагу марцI дува» тIисса аят («аль-Мудассир» суралул 4-мур аят) укун бувчIин бувссар: «Вила хасият ххуй дува».
9. АбухIафсахь хъинсса тIул-тIабиаьтрая цIувххукун, ганал укунсса жаваб дуллуссар: «Му – Аллагьнал ﷻ цала Идавсин ﷺ язи дургьумурди: «Инсантуращал кIукIлуну икIу, хъинмур буллали уча, ахIмакьтурая арх хьу» («аль-Аъраф» суралул 199-му аят).
10. Увкуну бур: «Хъинсса тIабиаьт – инава инсантуравух ухьурчагу, вила дакI Аллагьнащал дархIуну дитавури».
11. Увкуну бур: «Хъинсса хасият – халкьуннаясса аьнцI-ккихь ссавурданий бухIавури ва Заннал нясив бувмуний рязи шавури, цукунчIавсса гьалакшиву ягу буруккин къабувну».
12. Увкуну бур: «Оьсса тIул-тIабиат думанал дакI къума шайссар, цанчирча мивун цамур цичIав къадуххайнутIий».
13. Увкуну бур: «Оьккисса тIул-тIабиаьтрал лишан – цайминнал диялдакъашивуртту хIисав шавури».

«СалихIминнал тIабиаьт» тIисса луттирава