КIилчин тIивтIусса мизит
Февральданул 12-нний Ваччиял шяраву хьунни республикалул лагрулийсса диндалул мажлис. Шикку кIилчин тIивтIунни цIу буккан бувсса мизит.
Мизит цIу буккан баврил хьхьичIунми сиптачиталну хьуну бур Ваччиял шяраваллил имам Дибир-хIажи Рамазанов ва Ккуллал райондалул имам МухIаммад-маннар Бариев. Жяматгу вайннацIун бавкьуну Аллагьнал ﷻ къатлуву чIюлушин дурну дур.
Мажлис хъун буван Ваччав тамансса хъамал бувкIун бия: диндалул аьлимтал, имамтал, хIукуматрал идарарттал зузалт, пресса, райондалул жямат. Ххарисса иш – мизитравун бувкIминнавух чIявусса дуклаки оьрчIру ва жагьилтал бия.
Мизит тIитIаврин хас бувсса мажлис байбивхьуна М. Бариевлул. Ванал махъ буллуна аятру буккин Кьуръан дакIних кIулсса хIафиз МухIаммад-аьрифлухьхьун.
Мажлис хъун буван увкIун ия МахIачкъалалив диндалул дарсру дихьлай зузисса Йеменнавасса аьлимчу Ибрагьим АхIмад Зубаржи. Ккуллал райондалул жагьилтуран эбратран ванал цащала увцуну ия мукьилчин классраву дуклакисса арс. Бувсуна оьрчI школалийгу ххуйну дуклай ушиву ва Кьуръандалул арулва джуз дакIних кIулшиву (Кьуръандалуву цинугу 30 джуз буссар). Буттал ва арснал исвагьисса чIуний Кьуръандалувасса сурарду бувккуна.
Хъирив махъ лавхъуна МахIачкъалаливсса мизитрал имам Ибрагьим Ибрагьимовлул. Ванал бюххансса вяъза бувуна, бувсуна гьарцама бусурманчу Заннайн щукрулий икIан аьркиншиву.
Лакрал райондалул имам МухIаммад Саламовлул бувсуна чак баврил ва нитти-буттайн мютIину бивкIаврил агьамшивруя.
Мажлисрал ахирданий барчаллагьрал чагъар ва дакIний личIансса бахшиш пишкаш дуруна мизит цIу буккан баврил хъунмур харж цайнма лавсъсса Кьурбанов Давдин.
«Вай дунияллул бахшишрур. Ва мизит цIу буккан бавриву ка-кумаг бувминнансса мяйжансса бахшиш дикIантIиссар АллагьначIа. Ва дунияллий къакъунттул кюруксса мизитру бувминнан Аллагь Тааьланал Алжаннаву къаларду бувантIиссар куну бур хIадисраву» - увкуна райондалул имам М. Бариевлул.
Мажлисрая махъунмай наниххуллий хъамал бивуна Гъумуксса АхIмадул-Яманинал зияратрайн.
