Чемпион Ватандалийн ивунни
Чемпион Ватандалийн ивунни
Ноябрьданул 8-нний Гъумук хьунни миллатрал тарихраву личIансса, агьамшиву ва ххаришиву хъуннасса иш. Шикку лайкьсса даражалий хьунаавкьунни UFC-лул чемпион Ислам МахIачев.
Лакку билаятгу, Дагъусттангу бюхттул бувсса язисса чув барча уван ватандалийн бувкIун бия Аьрасатнал гьарца мурцIния. Миннавух бия политикалул ва жяматрал ишккаккулт, депутатътал, спортсментал, ишбажаранчитал. Лакку кIанттул дазуйн бувккун бия шаннагу лакрал райондалул вакилтал. Шичча Дагъусттаннал ттугъру ва чемпионнал суратру кIунттихьсса бурттигьалт хьхьичIну, Гъумукун дарчуна автомашинарттал кьюкьа. Наниххуллий, Хан-Муртазааьлил гьайкалданучIа ливккун, хъамакъабитулунсса суратругу рирщуну, хъамал бивуна Лакку улклул хъун миналийн, Гъази-Гъумукун.
Шикку тIурча, чемпионнах ссавур дакъа ялугьлай бия байрандалийн бувкIцири агьлу. ПаччахIххуллул тий ва ший бавцIусса чиваркIуннал кардугу дургьуну, Ислам хъамаллуращал лавгуна Гъумучиял Хъун-Мизитравун ахттайнчаклийн.
Чак бувну махъ Ккуллал райондалул имам МухIаммадманнар Бариевлул ва Лакрал райондалул имам МухIаммад Ссаламовлул чемпионнан пишкаш бувуна Кьуръандалул лу.
«Жула ялун нанисса никиран, жагьилтуран укунсса инсантурая эбрат ласун аьркинссар. Ванал къалиян къаучай, хIан къахIачIай, хъуниминнаха хIурмат бур, чак бувай, спортраву хьхьичIунну ур, Аллагь ва Идавс ﷺ ванан ххирар», – увкунни М. Ссаламовлул.
Муния махъ Ислам МахIачев барча уллалисса батIаву хьуна Гъумучиял клубраву.
Райондалул бакIчи Юсуп МахIаммадовлул Исламлун Лакрал райондалул «ХIурмат лавайсса гражданин» тIисса цIа дуллалишивугу баян бувну, бавхIуна ванай му иширал барашинна дуллалисса ятIул лента.
Миллатрал цIанихсса арс барча увна ДР-лул Халкьуннал Мажлисрал хъунаманал хъиривчу Камил Давдиевлул, Халкьуннал Мажлисрал Законну кьамул даврил комитетрал хъунама Артур Исрапиловлул, аьрщарал ва хъуслил иширттал министрнал хъиривчу Эмиль Ттаттаевлул, шяраваллил хозяйствалул министрнал хъиривчу Зураб Куччаевлул, МахIачкъала шагьрулул депутатътурал мажлисрал хъунама Марис Илиясовлул, шагьрулул Кировский, ЦIуссалакрал ва Ккуллал районнал администрациярттал бакIчитурал: СалихI Сагидовлул, ХIажи Айдиевлул, Шамил Рамазановлул, ДР-лул Хъунисриннал советрал хъунаманал хъиривчу Сиражуттин Илиясовлул, ДР-лул Жяматийсса Палаталул хъунаманал хъиривчу Ссапар Аьбдуллаевлул, Олимпий чемпион Ширвани Мурадовлул, гьалмахтурал, Ислам МахIачев хьхьичIунай ачин уван кабакьу буллай ивкIсса Камил ХIажиевлул.
Арс лахъа-хъун уллалисса мажлис лайкьсса даражалий сакин баврихлу Лакрал райондалул каялувчитурахь, администрациялул идарарттал зузалтрахь ва хъамаллурахь барчаллагь тIий, Исламлул буттал Рамазаннул кутIану увкуна: «Зу зула оьрчIал ххари буллай битаннав!» – куну.
