Лакку душварал мажлис
Лакку душварал мажлис
Март зурул мяйлчинмур кьини МахIачкъалалив, «Кегельбан» тIисса шадлугъру дувайсса залдануву, хьунни Рамазан зурун хас бувсса лакку хъаннил мажлис. Лакрал райондалул имам МухIаммад Майрановлул сипталийну ва мажлис хIадур бувну бия Муфтиятрал просвещениялул МахIачкъалаливсса хъаннил отделданул вара просвещениялул Лакрал ва Ккуллал районнайсса отделдал душваврал.
Найбунува кIицI лаганна, та заманнай къакIулли, утти-заманнул тарихраву лакрал хъаннил укун лахъа-хъунну Рамазан барз хьунабакьлакьисса мажлис къавхьушиву. Хъами цивппалу зума итадакьин ца ссупралухун бавтIсса мажлисру бувссар, ва даражалий, районная, цайми шагьрурдая лакку хъами цачIун бавтIсса, Рамазан зурул хIурмат буллалисса даву цалчинни дуллалисса.
Дайдихьу дурна мубараксса Кьуръандалул аятирттая. Аятру буккин оьвкуну бия республикалул азан учаврил конкурсрай ххув хьусса, Стамбуллай дурккусса хIафиз, Ххутиятусса МухIаммаднаби Буттаевлуйн. Мажлис усттарну бачин бувну бия радиожурналист, чIу ва гъалгъа магьир баврил тренер, машгьурсса Таиба Асадуллаева.
Исламрал диндалул ххуллу цIакьну буруччин аьркиншиврия ва му давриву хъаннилмур биялагу агьамсса бушиврия ихтилат бувна МухIаммад Майрановлул. Ванал балжину бувсуна, Ислам-дин цIакь хъанай дачиннин цIуну дунияллийн бувксса душру буччайсса бивкIшиву ва хасну Исламрал хъамитайпалул кьимат бюхттулну гьаз бувшиву. Бувсуна мукунма жяматрал оьрмулул иширттавухгу хъами чялишну гьуртту хъанай бушиврия, кулпатирттаву инсаншиврул кьимат хьхьичIунну бикIан аьркиншиврия, Исламрал кIулшивуртту куртIгу, цIакьгу дулларча, оьрчIру бяйкьусса ххуллийн къабуккантIишиврия.
БавтIцири барча буллай, вава мяъна-мурадрайсса ихтилатру бувна Дагъусттаннал Муфтийнал маслихIатчи Айна ХIамзатовал ва Муфтиятрал просвещениялул хъаннил отделданул хъунмур Ирина Аьлиевал.
Исламрал хъамитайпалул, ниттил гьарца инсаннал оьрмулуву рувхIанийсса ххуйшивуртту аьч дуваврия бия психолог, «На нинура» клуб хIасул бувсса, «Страна гор» радиолий «Жулва оьрчIру» тIисса передача дачин дайсса радиожурналист Аьйшат Расуловал (КьурбитIаевал) ихтилат. Ванил ниттихасса цила назмурдугу дурккуна.
Мажлисрал программа авадансса дия: Анисат АьбдуллатIиповал ва Шагьалай МахIаммадовал увкуна бюххансса нашидру, дурккуна назмурду, дурна викторинарду.
Мюрщиминнан лакку маз кIулну бурив ххал буллалисса викторина оьрчIру чялишну хIала буххансса куццуй дурна МахIачкъалаллал просвещениялул хъаннил отделданий зузисса Эльмира Нуруттиновал.
Душваврал ккаккан бувна телефонну багьана хьуну мюнпат бакъа чIун гьан дуллай бушиврия, муниясса заралдания бусласисса сценка.
ЧIивимур хIажлийнсса кIуну буккаврил лахIза бухьунссия мажлисрал ца яла яргмур. ТIайлабацIу хьуна Хъусращатусса ХIажисуплул душнин Сулайманова Анитан. Ахирданий дурккуна дуаьрдугу.
Мажлис къуртал хьуну мукьахсса цаппара душваврал пикрирдугу
Асият Буттаева:
– На барчаллагьрай бура ва даврил сиптачи МухIаммад Майрановлуйнгу, лавайсса даражалий дуван биялсса захIмат бивхьусса душваврайнгу. ДакIругу ца дурну, махъгу ца бувну лагма лавгун, ххуйсса даву дурунни. Зал бувцIуну бия, укун инсантал батIин, зал буцIин буван, ссупралий кьацI учинмур дишин личIину ка-кумаг бакъа къабигьассар. Вайннал дуллалимунил чIарав шайкун жувагу бацIаванну. Вай жулва имамтуралгу, душвавралгу буллалисса хIарачат миллатран барачатну хьуннав, вайннал дуллалисса давурттаягу, жуятувагу Аллагь ﷻ рязину личIаннав!
Уммукусум Паркьуева:
– Мажлис жува рязину личIансса даражалий лавгунни. Лакрал хъами мудангу гьармуниву хьхьичIунсса, итххявхсса бур, диндалул иширттавугу хьхьичIунну бивкIссар, жунма хIала-гьурттуну къуццу тIун аьркинссар жулла ялун нанисса никирал бучIантIимунил цIаний, му оьккимуния дуруччиншиврул, Исламрал тIайласса ххуллийн дурган дуваншиврул. Ххари хьура жулва ЧIурттащиял хъамигу чIявусса гьуртту шаврия.
Уммужигьан Рамазанова:
– На ттула чIаххуврайсса, маччасса хъаннищал ЦIуссаккулату бувкIссияв лакку мазрах мякьну. Мажлисгу бакIрая магърайн бияннин лакку мазрай бувссания хъина, ва цалчин дуллалисса даву духьувкун, хIисавравун ласунссар тIий бура. Уттиния тийнмай укунсса мажлисру марцIну лакку мазрай булларча хъина, хъамаллуралгу аьй къадувантIиссар.
Самрат Горчханова:
– Укун мажлисрайн бувкIукун, жунна ялун чIалачIимур так хIасиллур, жула итталумурди. ХIадуршиннар къачIалачIисса. Миллатирттал лаххиялуву пишпишгу тIий, аьчухну жува хьунабакьлай бия душру. Хъамаллуран ххаллилсса тIутIал кацIру бия. Викторинарттай ххув хьуми ххари бувансса бахшишру дия. Мюнпатсса информация бусса буклетру, чIапIив дачIлай бия. Ттун кIулли ва давриха хъунмасса захIмат бивхьушиву Лакрал ва Ккуллал районнал просвещениялул хъаннил отделениялул хъунмур ФатIима Аьлиевал. Ва ялун нанисса ник Исламрал ххуллий цIакьну дарцIусса шавриву биялсса хIарачат буллалисса инсан бур, ванин личIиссава барчаллагьри. Барчаллагьри, цалла дакIру цуксса къуману духьурчагу, жулла кьюкьлуву щябикIан бувкIсса, СВО-лий жанну кьурван дурсса вирттаврал ниттихъайнгу.
РайхIанат Исмяилова:
– На Самара шагьрулиясса бура, хаварбакъулий кунма багьунна ва мажлисрайнгу. Амма караматсса цамур дунияллийн багьсса кунмасса асардащал бувккун най бура ва залданува. Укунсса даражалул мероприятиялий цалчинна хьусса. Ттун хъинну ламус хьунни, ттулла Исламрал кIулшивуртту сайки дурагу дакъашиврия, ИсламрачIан кIункIу хьунни ттул дакI. Лак диндалия ятну бур тIун бикIай Самаралийсса диаспора. Биялсса душру бия залдануву, зал бувцIуну бия. Ва иширалгу дакI ххари дунни, нава диндалул инсан бакъахьурчагу. Хьулух тиягу-шиягу бавцIусса душваврал лаххия ябатIин къахьунну ххуйсса дия.
Анита Сулайманова:
– Ттунма чIиви ХIажлийнсса путевкалул кIуну буккайхту, ххаришиврул буса-учинмур бакъа ливчIунав. ХIатта ххаришиврул аьтIун ччисса иш бия. Гьанавиххи шаврил кIуну бувксса Сурхайхан тIисса оьрчIгу тиккува ххира уван къавхьунни. Та оьрчIангу цIуллушиву, талихI чIа тIий бура. АцIнияхъайсса шинну хьхьунни ттул ХIажлийн гьан ччай. ДакIнийхтуну барчаллагьрай бу-ра ва мажлис буван захIмат бивхьуцириннайнгу, мажлисрайн бувкIцириннайнгу, ттущалва ххари хьуцириннайнгу. Аллагьу Тааьланал жулла дуаьрду кьамул даннав, ужагъирттай барачатшиву ликканнав! Ва хIакьинусса мажлисрал барачат Лакку билаятрайнгу бияннав! Дяъвилул цIу лещаннав, циняв чиваркI цIуллуну-сагъну шаппай зана хьуннав! Я Аллагь, ва мубараксса Рамазан барзгу барачатращал ва дакьаврищал бувкIун лякъиннав!
