Дәрбәнд

Шаирләр вәсф едиб уҹалдан шәһәр,
Тарихчи алимләр гоҹалдан шәһәр,
Сән гәрар тутмусан ҝөј илә јерин,
Ҹәнҝавәр дағ илә мави Хәзәрин
Гуш ганад сахлајан сых арасында.
Бу улу дүнјанын ҝөр һарасында
Гүрурла дурмусан абидә Дәрбәнд,
Бир ҝүнүн кечмәјиб асудә, Дәрбәнд.

Хәзәрин дирилик сујундан ичиб,
Ичәришәһәрдән, маһалдан кечиб,
Јухары дырмашан бары, галадыр –
Јүксәкдә уҹалан Нарынгаладыр.
Булудлу ҝөјләрә дирәниб башын,
Һәлә дә там, дәгиг билинмир јашын.

Азанла ачылыр үзүнә сәһәр,
Ҝүнәш ишыг сачыр ҝөзүнә сәһәр.
Бурадан јајылыб Ислам мәғрибә,
Бурда һәр шеј ҝөзәл, һәр шеј гәрибә!
Танрынын нурудур Ҹүмә мәсҹиди,
Гафгаз дијарынын ҹаме мәсҹиди.
Мөминләр бурада намаз гылырлар,

Аллаһын адыјла нәфәс алырлар.
Гырхлар мәгбәрәси әзиз тутулур,
Илин һәр фәслиндә зијарәт олур.
Шәһидләрин руһу шәрифдир бизә,
Онларын хидмәти вар динимизә.

Еј зәнҝин тарихли севимли шәһәр,
Сусан даш зиреһли, ҝејимли шәһәр,
Һәр бир әјјамыны чох севирик биз,
Вар ҝөзәл арзумуз, саф нијјәтимиз -
Сән ҝәл ач сиррини, һекајәтини –
Биз јајаг дүнјаја фәзиләтини!

ТӘҺМИРАЗ ИМАМОВ, РУСИЈА ЈАЗЫЧЫЛАР ИТТИФАГЫНЫН ҺӘГИГИ ҮЗВҮ.