Къуръан цIалиялъухъ гIенеккиялъул пайдаби
Инсалги жиналги битIараб нухде тIоритIи.
Къуръаналда буго: «Рохел бице Къуръаналъухъ гIенеккулезда, гьелъул лъикIалда нахъги рилълъунезда. Гьел руго Аллагьас тIоритIарал гIадамал…».
ГIибадатлъун хъвай. Къуръан ккола жиб цIали гIибадатлъун рикIкIунеб гIамал. Гьелде гIинтIамиги гIибадат ккола.
РахIмат рещтIин.
Къуръаналда буго: «Нужее Къуръан цIалулеб заманалда нуж гьелъухъ гIенекке ва руцIцIун чIа, гьедин гьабуни нужеде Аллагьасул рахIмат рещтIина. Хирияб хIадисалда буго: «Цониги къавм Аллагьасул цониги рокъор Къуръан цIализе ва цоцазда малъизе данделъани, гьезде рещтIуна парахалъи ва гьел рахIматалъулъ тIерхьуна…», - ян.
Бадиса магIу бачIиналъе ва ракI тIеренлъиялъе сабаб.
Бичасул аварагас ﷺ ибну МасгIудида абуна жиндие Къуръан цIалеян. Дицайищ цIалилеб дуде рещтIараб Къуръанилан гьикъана гьес. Хирияв аварагас ﷺ абуна, жиндие бокьулин цогияс цIалулаго гIенеккизе. Цинги цIалана сурату «Ан-Нисаъ». Факайфа иза жиъна бика… абураб аят цIаларабго, гьанже тархъеян абунила гьес. Цинги жинда гьесул берал магIил цIунги рихьанила.
Балагьаздаса цIуни.
Инсан кинабниги квешлъиялдаса цIуниялъе рачIарал аятал цIалулев чи цIунаравлъун вукIуна балагь-къварилъабаздаса. Гьелги ккола сурату «ал-ФатихIа», суратул «Бакъараталъул» авалиял аятал, бакьулъел ва ахирисел, гьединго цоги аяталги.
Чорхое сахлъи щвей.
Къуръаналда руго сахлъи щулалъиялъул нияталда цIалулел аятал. Гьел цIалиялдалъун инсанасе сахлъи тIадбуссуна.
Ургъалаби тIаса роси. Гьелъул хасал аятал цIалани, ургъел тIаса босула ва гьеб тIагIуна.
