ХIикматаб сордо
ХIикматаб сордо
ГIагарлъулеб буго Исраъгун МигIражалъул сордо. Гьеб сордоялъ ккарал гIажаибал лъугьа-бахъиназул чангояб рехсела.
Малаикзабаз Аварагасул ﷺ керен хъвалхьи ва ракI чури
Цо-цо баяназда буго гьеб гьабулелъул ЖабрагIил, МикагIил ва Исрафил малаикзаби рукIанин. КагIбаялда аскIов кьижарав Аварагасухъе ﷺ рачIана гьел, ва аскIор рукIаразда халлъиларедухъ, гьевги вачун ана. Зам-замалъул лъеда аскIоб ЖабрагIил малаикас, щибго унти лъачIого ва биги бачIинчIого гьесул ﷺ керен рагьана ва гьениса бахъун ракI лъабго нухалъ чурана. Цинги иманалъгун цIодорлъи-гIакъиллъиялъ цIезабуна ва авараглъиялъул мугьруги чIвана. Хадуб букIараб бакIалда лъун керенги букIахъе данде бачун къана, ракIги хIалтIизе лъугьана.
Масжидул Акъсаялде щвей
Гьеб сордоялъ Аварагасухъе ﷺ бачун бачIана Алжаналдаса Буракъ абураб цIаралъул хIайван. Гьеб букIана халатаб, хъахIаб, хIамаялдаса борхатаб, гIорцIеналдаса къокъаб хIайван. Гьелъ, бералда цебе бихьулеб манзил, лахIзаталда жаниб нахъа толеб букIана. Гьелдаги рекIун Маккаялдаса Авараг ﷺ Иерусалималда бугеб Масжидул Акъсаялде щвана.
Ункъо бакIалда лъалхъи
Иерусалималде щвезегIан Аварагас ﷺ лъалхъи гьабуна: Мадинаялда, Мадян абураб бакIалда бугеб Муса аварагасулин абулеб гъветIалда аскIоб, Аллагьасгун ﷻ Муса аварагас кIалъай гьабураб ТIура Сайнаъ абураб магIарда ва ГIиса авараг гьавураб бакIалда. Гьел бакIазда лъалхъи гьабун Аварагас ﷺ кIиго ракагIат какилги бана.
Киналго аварагзабазгун как бай
Масжидул Акъсаялда аскIове щведал, цогидал аварагзабаз хIайванал рухьараб бакIалда букIараб горалда Аварагасги ﷺ Буракъ бухьана, цинги мажгиталде лъугьана. Аллагьасул ﷻ амруялдалъун гьенир данделъун рукIана киналниги аварагзабигун расулзаби. Гьенир гIахьаллъаразе имамлъи гьабун Аварагас ﷺ кIиго ракагIаталъул какги бана.
Нуралдаса мали
Мажгиталда какги бан Авараг ﷺ къватIиве вахъана. Цинги зодоса гIодобе бачIана илагьияб нуралъул мали, гьелдеги вахун Авараг ﷺ зодове вахана.
Аварагзабигун дандчIвай
Гьедин тIаде вахун Авараг ﷺ анкьабго зодове щвана ва микьго авараггун дандги чIвана. ТIоцебесеб зодов ватана Адам авараг, гьес Аварагасе ﷺ салам кьуна ва жиндие цIоб-баракат гьарейин БетIергьанасдайин гьарана. КIиабилеб зодов ГIиса ва ЯхIя аварагзабигун данделъана, лъабабилелда Юсуфгун, ункъабилелда Идрисгун, щуабилелда Гьарунгун, анлъабилелда Мусагун, анкьабилелда Ибрагьимгун, жидеда Аллагьасул ﷻ свалат-салам лъеял.
ЖабрагIилгун ватIалъи
Гьеб сордоялъ Аварагасе ﷺ нухмалъи гьабулевлъун вукIана ЖабрагIил малаик. Амма Сидартул мунтагьа абураб бакIалде щведал, ЖабрагIил малаикас абуна: «Гьаниб дир макъам лъугIана. Я Аллагьасул ﷻ вокьулев! Цоги гали дица цебехун босани, дун вухIула», - ян. Гьеб кколеб буго рахине кIолел бакIазул бищун тIадегIанаб, гьениса церехун ине цониги малаикасдацин кIолеб гьечIо.
БетIергьангун ﷻ дандчIвай
Гьеб бакIалда ЖабрагIил малаикги тун, Авараг ﷺ цевехун ана. Цинги, киналниги пардавалги рагьун, Аварагасда ﷺ гIемерал кIуди-кIудиял илагьиял балъголъаби, гIаламатал рихьана. Щибго пардав цебе гьечIого Аварагасда ﷺ Аллагь ﷻ, Гьесул ﷻ кIодолъи, хIалкIвей, тIадегIанлъи бихьана. Цинги Аллагь ﷻ Аварагасдехун ﷺ гьоркьов чи гьечIого адаб-хIурматалда кIалъана.
Как парзлъун гьаби
Гьеб сордоялъ умматалъе парзлъун гьабуна къойил щуго как бай. ТIоцебе 50 как бай тIад гьабун букIана, хадуб Муса аварагасул малъа-хъваялдалъун Аварагас ﷺ гьарун Аллагьас ﷻ гьеб щугоялде щвезегIан дагь гьабуна. Как парзлъун гьаби гуребги, гьеб сордоялъ Аллагьас ﷻ лъугIизабуна «Бакъарат» сура рещтIин ва МухIаммадил ﷺ умматалдаса гIадамазул гьабулеб гIамалалъулъ ширк гьабиялде ккечIезе чIахIиял мунагьал чуриги кьуна.
ЛахIзаталда жаниб кинабго лъугьин
Исраъ ва МигIражалъул бицунаго, Аварагас ﷺ кIвар буссинабулаан гьеб кинабго лъугьанин лахIзаталда жанибин абун. Авараг ﷺ къватIиве вачине ЖабрагIил малаик вачIиндал, гьев тункун вуго аскIоб букIараб лъел цIураб гулгуналда. Гьеб кинабгоги лъугьун тIадвуссун щведал, Авараг ﷺ нахърегIун вуго бегун унеб букIараб гулгун кквезе.
Гьанир рехсарал гурелги Аварагасда ﷺ гIемер батIи-батIиял жал рихьана гьеб сордоялъ. МухIканго баян гьабун бихьизабуна Алжан, жужахI, ахир къиямасеб къоялъ лъугьине бугеб, зобал-ракьазулъ бугеб, гьениб лъугьунеб кинабго.
Аллагьас ﷻ киналго гьареги гьал хириял моцIал Гьев ﷻ разияб гIамалалда тIамулеллъун ва хирияв Аварагасул ﷺ нух ккурал, гьесул ﷺ шафагIат щолездасан. Амин!
