Иманалъул щулалъи
Иманалъул щулалъи
Румазулгун ккараб гъазаваталда, машгьурав асхIаб, ХIузайфатил вас ГIабдуллагь кверде восана Аллагьасул тушбабаз. Гьев ханасухъе вачана ва ханас гьесда абуна:
«Исламги тун нижер диналде вачIани, дица дир магIишаталъул цо бутIаги, чIужулъун дирго ясги кьела», - ян.
«Дур тIолабго буголъи, хIатта тIаде гIарабазул кинабго бечелъи кьуниги цо лахIзаталъ дица МухIаммадил дин таралъухъ, дица нужер гьари къабул гьабуларо», - ян жаваб кьуна ХIузайфатил вас ГIабдуллагьица.
Ханас буюрухъ кьуна ГIабдуллагь къадада цеве чIезавеян ва дандритIун чIорбутIчагIиги чIезаруна. Цинги ханас амру гьабуна чIорал речIчIеян, гьесда щвеларедухъ. Гьев хIинкъизе.
Байбихьана чIорал речIчIизе ва щибаб нухалда ханас асхIабасда гьарулеб букIана насранияб дин босеян. Амма ГIабдуллагьида къуркьизе ракIалда букIинчIо.
Гьесул къвакIи бихьидал, ханас амру гьабуна вичеян ва гьалделеб бугеб хьагиниве рехеян. Цин ханасул буюрухъалдалъун цоги бусурбанчи рехана гьениве. Гьеб мехалдаги ГIабдуллагь къуркьичIо.
Кваразги вухьун хьагиниве виччалаго, ГIабдуллагьил магIу гирана. Гьеб бихьарав ханасда ракIалде ккана асхIаб тамахлъанин ва амру гьабуна нахъе восеян. Цинги ханас гьикъана щайин гIодулев вугевилан абун.
ГIабдуллагьица абуна, хьагиниве валагьидал ракIалде щванин дирго черх, гьеб цохIо букIин. Гьелъ къварилъизеги бачIанин абун.
«Дие бокьилаан дир черхалда бугеб рас рикIкIун къаркъала букIине, дица гьел киналго Аллагьасул нухда хвезаризе рукIине», - абун.
Бахьикъосарав ханасда бичIчIана асхIабасул иман кьуругIан щулияб букIин ва гьес абуна:
- Дир ботIрода убач гьабуни, дица мун тархъан гьавила, - ян.
- Дида цадахъ ругел бусурбабиги риччани, гьабила, - ян жаваб кьуна ГIабдуллагьица. ЛъикI бугинги абун, разилъана ханги.
ГIабдуллагьица ханасул ботIрода убач гьабуна ва ханас киналго асирал тархъан гьаруна.
Цинги киналго Мадинаялде нахъруссана.
Аварагасул ﷺ халифа ГIумар-асхIабасда рагIана гьеб лъугьа-бахъин. Цинги ГIумар-асхIабас абуна:
«Жакъа тIолалго бусурбабазда тIадаб буго ХIузайфатил вас ГIабдуллагьил ботIрода убач гьабизе», - ян.
Ва тIоцебе жинцагоги гьабуна.
