ГIазизай эбел

Эбел, дур гьурмада гьел рукӀкӀалаби,
РикӀкӀине щварабго щаклъи ккола дир,
Щуявго васасул сайгъатал ругин,
Соназ данде гьарун дуца цӀунарал.

ЦӀикӀкӀун ратарабго рукӀкӀарал кьерал,
КьертӀун валагьула гьезухъ нечадго,
Нижер гӀайибазул гӀузрабаз лъурал,
ЛъалкӀал ратилин ккун раккарал къватӀир.

КӀазикьан раккарал хъахӀал расазги,
Хъвала дир ракӀалда рукӀкӀеналъ гӀадин:
Ратизе гурин гьел нижер гъалатӀаз,
Гъалазда гъорлъ тарал гъулбасалилан.

Гъулукал беразулъ бихьула дида,
Бахьи гӀураб бихьун гӀорцӀун гьечӀеллъи.
ГӀажаибаб берзул балагьиялъулъ,
Баянлъула рекӀелъ бугеблъи рокьи.

БахӀараб замана захӀмат иналъул,
Загьираб гьеб хӀасил халлъула рекӀелъ.
ХӀалхьи хвезабурал хасалил сардаз,
Свине гьабураб нур ссудула каранлъ.

ХӀеренал квераца кодоре рачун,
Кинида рущарал щуялго чанцӀул?
ЧӀамун кваназе кьун, кинидахъ кӀусун,
КӀикӀараб чан гьулак квер собозегӀан.

Рахъун кинидасан карандеги къан,
Канлъи биччазегӀан бачараб чан ахх?
Бадисан гирулел магӀил гаралгун,
Гор чанцӀул сверараб сардил макьу тун?

Сабураб гьурмадул гьимиялда гъорлъ,
ГьитӀинабго тӀанкӀалъ тӀатинабула,
ТӀолабго гӀумру кьун гӀезаруниги,
ГӀураб жаваб нижер жеги щвечӀеблъи.

Щуявго васасул баркала эбел,
БахӀараб гӀумру кьун гӀезе гьарурай.
ГӀазизай, хӏалимай, хӀеренай эбел,
Дур хӀурмат цӀунизе хӀадур руго ниж.

САГIИД ОРДАШОВ, ИЧИЧIАЛИ РОСУ