ТӀаса лъугьа, эбел
ТӀаса лъугьа, эбел
Эбелин абулеб гьеб рагӀиялъул
Гъварилъи балагье, щибаб мацӀалда.
ЛъагӀалида жаниб цо къо гьелъий кьей,
Рекъон букӀунаро бусурбабазда.
Щайилан гьикъани, дуе гьелъ кьуна
ТӀубарабго лъагӀел, рекӀеда гъоркь бакӀ.
КӀиго сон кодобги, кинабго гӀумру,
РекӀелъ ккун ваччана щивав эбелалъ.
Эбелалъул буго лъабнусабго къо,
Лъабкъоялда щуго жеги тӀадеги.
ТӀадеги щибалъул къоло ункъабго,
СагӀатги гьелъие мустахӀикълъана.
Дие гӀумру кьурай, рокьиги кьурай,
Щибаб хӀухьел кьурай, хӀалхьиги кьурай.
ХӀинкъарабго аман жиндилъ батарай,
ХӀал кӀоларо дида шукру гьабизе.
ГьитӀинго тарбия гьелъ кьола нилъей,
Аллагьасда иман малъана дида.
Исламияб хьвади, вукӀа-вахъинги,
ГӀаданлъун вукӀинги - гьелъул тарбия.
Аллагьасул рахӀмат буго ракьалда,
Дунял кьунаниги хисиго гьечӀеб.
Гьеб рахӀматги буго ракьалда бугеб,
Эбелин абулеб Бичасул малайк.
Гьанже бицеха вац, щиб къо доб бугеб,
Эбелалъул абун бихьизабураб.
Дуе гӀумру кьурай, кьалбалги кьурай,
Кьурулъун мун цӀунун нахъаги чӀарай.
Дунял-ухраялда бакӀ щвечӀониги,
Божараб бакӀ буго дуй гьелъул рекӀелъ.
Къварилъиги гьечӀеб, ургъелги гьечӀеб,
ХӀинкъи-къайги гьечӀеб, гьава рекъараб.
ТӀаса лъугьа, эбел, мун васасдаса,
Чанги рекӀел бакъвай гьабуна дица.
Цониги нух гьечӀо гьабуралдаса
РакӀ бакъван гурого. Мун тӀаса лъугьа.
