Дагъистаналъул муфтиясде
Дагъистаналъул муфтиясде
АхIмад-хIажи афанди, Дагъистаналъул халиф,
ГIелмуялъул цевехъан, исламалъул иццул кIал.
ГIелму, гIакълу камилав, гIадлу-низам къвакIарав,
Исламалде халкъ цIалев, цIар тIалаб гьабуларев.
Ракълие керен кьурав, кьалуде мугъ рехулев,
Халикъасул нухдасан гIалам данде бачунев.
Аллагьасул хIалкIолъи, унго, хIикматав инсан,
Исламалъул нух ккурав тIарикъаталъул устар.
ЗахIмалъаби хIехьарав, къварилъаби раччарав,
Сордоялъ макьу гурев, къоялъул хIалхьи гьечIев.
Халкъалъул ургъалица бадиса магIу тIолев,
ТIолабго гIаламалъул пикру-хIисаб гьабулев.
Аллагьасдаса хIинкъун, ХIабибасул амру ккун,
ГIарабазул чалма къан гIумру жинца тIамурав.
ГIелму жиндилъ цIикIкIарав, иман жиндилъ гъваридав,
ВагIза-насихIаталъулъ мухIканлъи жиндир бугев.
ГIарабиялде ритIун гIолохъаби куцарав,
ТIолабго Россиялда гIелму загьир гьабурав.
Пакъирав рехун течIев, къваридав вакъун течIев,
Дагъистаналъул имам - АхIмад-хIажи афанди.
ТIолго дур муридзаби дуе мутIигIал руго,
Гьезул берцинаб кьералъ Дагъистан тIегьан буго.
Мадрасаби хьихьулел, мажгитал къачIан кьолел,
Киналго муридзаби дур дугIаялъ ккун руго.
Щукру, алхIамдулиЛлагь, рецц Аллагьасе буго,
Мун нахъа вукIин буго халкъалъул цохIо рохел.
Дур сабурлъи камилаб, каламги дур хIеренаб,
ГIелмуялъул тIахьазда бицун буго кинабго.
Даим цолъун хутIаги исламалъул жамагIат,
ЖахIда-хIусудалдаса Аллагьас нуж цIунаги.
Рохелал гьарзалъаги, гьабулеб нухда ккаги,
РекIел мурадал тIуран, сахлъи щулияб кьеги.
ТIолалго устарзаби - баркаталъул ралъадал,
ТIолалго муридзаби - ралъдалъе чвахулеб лъар.
ТIолалго бусурбаби - тIарикъаталъул агьлу,
Расуласул баркат щун Алжан насиб гьабеги.
