Эбелалъул бухIи
Эбелалъул бухIи
Гьардарав гуревдай Адам авараг,
Эбел къанщулелъул къаданив чIечIев.
Гъаримай гурейдай Адамил ХIава,
Гьелъул тIагIамалъул тIокIлъи бихьичIей.
Эбел камураца керен бихьула,
Заман бахъарабгIан бухIулеб бугин.
Эбел, дуда хадуй хвелилан гуро,
Холарей мунин ккун боссе щвечIо лъай.
НигIматал рикьулеб кьодул сак тIуна,
Дур беразул тIелхал тIатIала ккедал.
РахIматал рорцунеб роцен бекана,
Баркат бугеб кверзул квали лъугIидал.
Маржанал жемулеб жавгьарул габур,
Нуралъе цIунарай цIар бугей, эбел.
ЧохтIо жанир цIурал чилайдул гъалал,
Малайкзабаздацин рихьичIей эбел.
Эбел, гьарай-дарман, Алжаналъул пихъ
БецIцIун тIагIаниги тIагIам холарей.
Эбел, гьарай-дарман, нуралъул хIуби,
Канлъи тIагIаниги кунчIи ссунарей.
Эбел йигеб гIумру – бакъул дуниял,
Сундулъго нижее ургъел толареб.
Эбел гьечIеб гIумру - чIегIераб сордо,
РекIей рохел гьечIеб, баркат лъугIараб.
Эбел йигеб заман – Зам-замалъул ицц,
КигIан гьекъаниги къеч буссунареб.
Эбел, мун йигелда къо релълъунаро,
Къварилъи бицине, ургъел бикьизе.
Дуде чучанани чапун биунеб,
Чармил гулла буго гьанже каранда.
Гьикъизе мун гьечIел мекъи кканани,
Малаикзабаца гIайиб чIваладай?
ЖужахIалдаса ниж цIунизе ккани,
Жий юхIеян абун ячIуней эбел.
Дуца нижей гIоло рорчIарал сардал,
ГIарщалъул рагIдукье кьижизе щваги.
Эбел, мунгун квараб тIагIам батIияб,
ТIолго гIалам гьелъул махIалъ гIорцIулеб.
Мунго якъунги чIун нижей квен кьурай,
Кьеги хIурулгIиназ Алжанул нигIмат.
АлхIамду, рецц Дуе, хирияв Аллагь,
ХIабиб МухIамадил умматлъун рати.
Эбелалъул бухIи жидеда лъачIел,
Адамилгун ХIавал лъимал ниж рати.
