ГIумрудул цоги сон ана
Цо лъагIел тIасаги ун,
ТIаде цоги бачIуна.
Гьелда дандчIвай гьабизе,
КъачIадула гIадамал.
ГIемерал нигIматал лъун,
Остолал хIадурула.
ХIарам букIин лъаниги,
Лъола чагъир-гIаракъи.
ГIадамал цоцахъе ун,
Цадахъаб квана-гьекъей.
Корпоратив, вечерал,
Чахьал дандцураб кьурди.
Кьвагьулеб шампанскийги,
Шушбузул чвархъи-гIанхъи.
"ГIив"- илан ахIулаго,
АхIулеб кечI-бакъанги.
Къаси сордо борчIулел,
Гьединал камуларо.
Радакьиде кьижун ккун,
Какил гIуж гьоркьоб уна.
Гьединаб хIасилалде,
ХIарамалъ нилъ рачуна.
РакIал пашман гьарулеб,
Ахир гьелъул батула.
Халикъас исламалда,
Бихьизе жиб гьабичIеб,
Гьеб байрам кIодо гьаби, -
Иманалъул загIиплъи.
Зодобе гIарац кьвагьи,
ГIакълуялъул мукъсанлъи.
Буголъи исрап гьаби,
Буго гьебги ахIмакълъи.
Имамзабаз гьарулел,
Гьелда хурхун вагIзаби,
ГIадалъе росуларел,
ГIадамал гIинкъалдайха?
ГIалимзабаз мухIканго,
Мунагьазул бицунел,
НасихIатал нилъеда,
РагIулел щайзе гьечIел?
ЧIалгIаде заман тIами,
ТIагьаясул ццим бахъин.
Цинги БетIергьанасул,
БукIине бугеб хIисаб.
Суал кьураб сагIаталъ,
Кьезе жаваб батичIищ,
БукIина дуе хIинкъи,
ХIаким гурхIичIонани.
ХIалкIвараб жигар бахъе,
Бичас рази гьавизе.
Гьесул парзалги тIуран,
ТIад лъечIеб рехунги тун.
Расуласул суннат ккве,
Салават кIочон тоге.
Камиларо шапагIат,
ГIарасат майданалда.
Киналго бусурбаби,
КантIизаре, БетIергьан,
Квешалдаса рикIкIалъун,
ЛъикIлъиялде руссине.
