Баркиялъул насихIат
Баркиялъул насихIат
Хирияб рамазан моцI тIаде щведал,
ТIаса лъугьин гьарун гьабилин калам.
Къуръаналъул аят гIемераб цIалун,
Хваразде зиярат, воре, кIочонге.
Заманалъ ахIулеб гIидалъул какда,
Киналго вацазда барке квер босун.
Баракат гIемераб гIид - хIакъаб байрам,
БукIагиян гьаре къабуллъулеблъун.
Рарал какал нужер къабул гьареги,
Рахъарал сахIазул кири цIикIаги.
Чорхой сахлъи кьеги, иман рекIелъгун,
Уммат разилъулеб букIаги гIамал.
ГIазаб-зулмуялъул балагьал нахъчIван,
БачIараб батаги кIал биччараб къо.
Лъимал-хъизамазда баракат лъеги,
БоцIи-панз РахIманас хIалалаб кьеги.
РачIунел соназги дандчIвай гьабизе,
ТIаса чи инчIого чIаго хутIаги.
Ккарал гъалатIазде тIаде ракь хъван те,
Тавбу цIияб гьабе мунагь чуризе.
Воре, гьари буго диналъул вац-яц,
Цоцалъ рекъон рукIа, иблис къезабе.
Къокъаб заманалъул дунял буго гьаб,
Дудаго лъачIого лъугIун батулеб.
