Тоге гIибадат рехун

Тоге гIибадат рехун

ГIумрудул къоял лъугIун,
Лъела хвалил бусада.
Бичасул къадар щведал,
Щвела дихъе ГIизраил.
ЛъикIал-квешал киналго,
Ккарал дихъа пишаби,
Пирхараб пири гIадин,
РачIун цере гьел чIела.
ЧIунтаяб дир къаркъала,
Къваридго ракI лъугьина,
КъваригIел гьечIебщинаб,
Гьениб гIемер батидал.
Бицараб рагIи букIа,
Балагьараб бер букIа.
Бегьулареб саяхълъи,
Свера-тирун заман чIвай.
Какил кIварго гьабичIо,
КIалал кквезе бокьичIо.
Бокьараб гьабе абун,
Биччан тана дирго напс.
Теян абураб гьабун,
Гьабеян абураб тун,
Тана гIумрудул сонал,
Нахъа хвел букIин кIочон.
Халикъасда цеве щун,
Щиб хIалдайха букIина,
КIудияв дир БетIергьан,
ТIаса лъугьинчIонани.
Гьанже бокьилаан дий,
Дагьалъ хвел нахъбахъизе.
Халикъ дида разияб,
ГIамал гьабун хьвадизе.
ГIибадат мухIкан гьабун,
Гьарурал мунагьазда,
РакI бухIун тавбу гьабун,
Гьедин къоял тIамизе.
Дир къисмат гьадин ккана,
Кинниги хьулги буго
РухI иманалда босун,
БетIергьан гурхIиялда.
ХIабиб нилъер авараг,
Аллагьасда цеве чIун,
ШафагIаталъ восизе,
Изну тIалаб гьабилин.
ТIадруссин гьечIел къоял,
Къваридго вуго гьанже.
Къимат гьабичIеб заман,
Гьелда ракI бухIун вуго.
Воре, диналъул агьлу,
Аллагь кIочон хьвадуге.
КIудияб ГIарщалъул Хан,
Халикъ ракIалда вукIа.
Дица гьанир хъван тарал,
Мухъазул хIисаб гьабун,
Гьабе ножеца гIамал,
ГIарасалда рохулеб.
Халикъасул гурхIелгун,
ХIабибасул шапагIат,
Щвезе бокьун батани,
Тоге гIибадат рехун.
ГIумру тIаса унеб жо,
ТIаде хвел бачIин хIакъаб.
ХIакъав Бичасда цере,
ЧIезе рукIин кIочонге.
КIудияб хIинкъи бугеб,
МахIшаралъул къоялде,
КъачIан хIадурлъи гьабе,
Гьарула, бусурбаби!

МухIаммад Ражабов, ТIелекь росу