Маккаялде щведал

Маккаялде щведал

Салам, Макка-Хӏарам, салам, Кагӏба-рукъ,

Салам, Ибрагьимил чӏухӏараб макъам.

Салам, Хӏажрул асвад, салам, Гӏарафа,

Салам, Сафва-Марва, салам, Муздалиф.

Духъе, анищалда, инагьдилаго,

Кӏикъойилъа тӏаде сонал арав дун.

Бетӏергьанас ахӏун, Хӏабибас вачун

Гьале Маккаялде жанив лъугьунев.

Унго, бугищ гьаб бакӏ Маккаялъул ракь,

Макьу батила гьаб цебе тӏамулеб.

Унго, дир бугищ гьаб соролеб хӏетӏе,

Хӏарамалде жаниб тӏамулеб бугеб?

Гьабищ доб къадруяб хирияб Макка,

Хирияв гьавураб баракатаб ракь.

Гьаб гурищ Аллагьас гурхӏел гьабурал

Гьоболлъухъ ахӏулеб хӏикматаб шагьар.

Гьаниб гурищ бугеб зам-замалъул ицц,

Жиб гӏадаб ракьалда цойги баккичIеб.

Гьаб гурищ бицунеб доб хӏикматаб лъим,

Хӏажизабаз кӏалчӏван къойил гьекъолеб.

Доб гурищ бищунго борхатаб мегӏер,

Гъару-Савруйилан жинда абулеб.

Авараг гьижраялъ гочун унелъул,

Гьес сардал рорчӏараб гьитӏинаб нохъо.

Доба тӏаса гьечӏищ хирияб Хӏираъ,

Хӏабибас гӏибадат гӏемер гьабураб.

Тӏоцебесеб аят - Икъраъги рещтӏун,

Аллагьас халкъалде илчи витӏараб.

Гьале дун гӏумрудул анищ тӏубарав,

Бабу-Саламалъул кавудахъ лъалхъун.

Кверал тӏаде рорхун Рахӏманасдаса,

Жаниве лъугьине изну гьарулев.

Зодибе нур щвараб чӏегӏераб Кагӏба,

Чӏун хутӏана дир ракӏ дуда бер чӏвайдал.

Берал чвахулаго, черх соролаго,

Салам кьуна дица дур свериялъе.

ТӀавафул къудуми гьабун бахъиндал,

Гьабуна дицаги Бичасде хитӏаб.

ТӀаде гьаваялде квералги рорхун,

Ахӏун тана дица бухӏулеб ракӏалъ:

Я, хӏал кӏолев Аллагь, халкъалъул Магӏбуд,

Дуца гьоболлъухъе ахӏун вугелъул,

Ахӏун духъе щварав дур загӏипав лагъ,

Мурад тӏубачӏого чӏового тоге.

Я, гьайбатаб Кагӏба, къадруяб Хӏарам,

Дир шагьадаталъе нуж нугӏзал руго.

Я, гьал Маккаялъул рорхатал мугӏрул,

Нуж хӏужалъун рукӏа дир дугӏаялъе.

Я, архӏама ррахӏим, гурхӏулев Аллагь, 

Гьал хӏажизабазул хӏеж къабул гьабе.

Гьанире рачӏине гӏищкъу бугезул

Къеч нахъбуссинабе гьаб ракьги бихьун.

Къабулаб хӏежги кьун, мунагьал чурун,

Рекӏел мурад тӏубан тӏадруссун раче.

Нижер гӏамалазухъ халгьабичӏого,

Мун, халикъу Ррахӏман, гурхӏун те, Аллагь.

Aхир заманалъул питнабаздаса

Мухӏаммадил уммат цӏунун те, Аллагь. 

Ниж, гӏажизал лагъзал, загӏипаб уммат,

Дур рахӏматалдаса махӏрум гьаруге.

Мухӏаммадил вас Гьитӏихӏма, Зивуриб росу