РабигIул аввал моцI
РабигIул аввал моцI
ГIаламалъул хирияв,
Халкъалда загьирлъараб,
ЛъикIал моцIазул цояб,
Гьале тIаде гIунтIана.
Аллагьасе вокьулев,
Ракьалде жив вачIараб,
БачIун тIаде рещтIана,
РабигIул аввалаб моцI.
Нилъер хирияв ХIабиб,
Дунялалде лъугьараб,
РабигIул аввалалъе,
МархIабаян абизин.
МархIаба, хирияб моцI,
Расул гьавун хадуса,
КагIбаялъул рукIарал
Хъанчал кIихIи рекараб.
Расул, нилъер авараг,
АнцIила кIиабилеб
Итниялъ гьавунилан,
Буго рехсей гьабулеб.
Гьавураб сагIаталда,
Суждаялда речIчIарав.
Уммат хвасар гьабеян,
Аллагьасде гьардарав.
Гьавураб къоялдаса,
Къанщун берал инегIан,
Умматалъул ургъалилъ
ВукIарав нилъер ХIабиб.
ХIабибуЛлагьги вокьун,
Свалат гьесде битIани,
Буго гьесул рахъалъан
ШафагIаталъ росиги.
Гьединав ХIабибасул,
ХIалкъай гьабун данделъун,
Досул бицен гьабуни,
Баракат нилъей щвела.
Щивас жиндирго рокъоб,
Рукъалъул агьлуялъе,
Аварагасул бицун
Берцинаб мажлис гIуцIе.
Данде руссун авараг,
Веццун мавлид ахIизе,
ХIалкIоларел гIадамаз,
БитIе гьесде салават.
Салават гIемер битIун,
ТIагьал суннатал тIуран,
ТIобитIе бусурбаби,
БачIараб хирияб моцI.
БетIергьан разилъила,
РасулуЛлагь вохила.
Гьесул баркат, шафагIат,
Щвеялде хьулги лъела.
ЛъикIал гIамалал гьарун,
Гьаб РабигIул аввал моцI,
Берцинго тIобитIизе,
ТIадегIанас хIал кьеги.
ХIабибуЛлагь рехсезе,
Свалат гIемер битIизе,
Суннатал гьесул кквезе,
Кумек РахIманас кьеги.
Амин, Аллагь, я Аллагь!
Амин, Аллагь, я Аллагь!
Къабул гьабе БетIергьан,
Гьабураб гьаб дир назму.
МухIаммад Ражабов,
ТIелекь росу
