Унел руго къоял…
Унел руго къоял…
Ина къоял къокъун, къокълъила гIумру,
Къадаралде щолеб щвела замана.
Зодихъ бакъ тIерхьина, моцI баккиларо,
ЦIвабиги кунчIи ссун, кирго рилила.
Къина нилъей гIорал, тIагIина лъарал,
Берцинаб тIабигIат бецIлъун бихьила.
Бихьизе риччарал нилъ дунялалде
Циндаго дуниял дур гуреб лъала.
Гьаб гIумрудул ахир - ахират-авал,
АскIов щивго гьечIеб, огь, чIобоголъи,
ЧIаго ругел мехалъ къимат гьабичIеб,
Ахирисеб хIухьел, хIалалъ унеб рухI.
ЦохIо мунги, рухIги, цохIо Аллагьги
ГьечIеб дуй гьабизе лъилниги кумек.
Сверухъ ракIарарал я рокъосезул,
Я дуниял цIурал лъалел-хъвалезул.
Параялъ паркъила беразда цебе,
Доб букIарабщинаб, доб тарабщинаб.
Щибизе бокьараб гьаб кьогIаб дунял?
Вокьулев БетIергьан, гьабе цо кумек.
Дунялги хиралъун, хивал гIемерлъун
ГIумруялъ хьваданин, бихьила гьанже.
Аллагь гурхIалида балагьичIони,
РорчIизе бакI гьечIеб чIегIераб тIонкIо.
ЦохIо, кумекалъе квер кьолеб тавбу,
Кьурулъан унелъул хIетIе лъолеб хIокI.
ХIалкIолев БетIергьан, тIадегIанав Хан,
Ахираб лахIзаталъ ниж рехун тоге.
ХIакъаб каламалъе гIундул рахчарал,
ХIакъикъат бихьизе берал къанщарал,
Къосине тоге ниж, хирияв Аллагь,
Гьабе нижей жаваб дуде руссунеб.
ГIаршалъул, Курсалъул кверщел кодосев,
Гьелъул рагIад нижей щолеблъун гьаре.
Алжан-жужахIалъул хIал бугев Аллагь,
ХIалалаблъун гьабе Фирдаус-алжан.
Нижер мунагьазул бакIал гьираца
Гьод къулизе гьабун, хIакъир гьаруге.
Тавбу къабул гьабун, тархъанги гьарун,
Гьардарав, БетIергьан, мун тIаса лъугьа.
