Гьаб дуниял цIураб нигIмат кьуниги...

Гьаб дуниял цIураб нигIмат кьуниги
Дур бер гIорцIиледухъ мун бечелъанищ?
ХIалхьиги рахIатги къойил щваниги
Гьелъий рец гьабизе гIакълу дуй гIолищ.

ЧIаго хьолбохъ ругел эбелгун эмен
Гьезул адаб цIунун аскIов вукIанищ
Чангиязул гьечIел яцалгун вацал
Къварид гьаричIого тун бажаранищ.

ТIас йищун ячарай хирияй лъади
Жавгьар якъутгIадин дуца цIунанищ
Чангиязе кьечIел гьайбатал лъимал
Ясберлъун цIунизе къуват дур гIолищ.

Какил сас рагIидал адабги цIунун
КIалъачIого чIезе духъ бажарулищ
Гьеб ахIун лъугIидал мажгиталде ун
ДжамагIатгун цадахъ как дуца балищ.

Аллагьас тIад лъурал фарзгун суннатал
ТIаса рехичIого дуца тIуралищ
ТIадегIанав Аллагь ритIухъги гьавун
Шагьадатги битIун тавбу гьабулищ.

ТIаса бищизелъун нилъее кьураб
ЛъикIабги квешабги батIа гьабунищ
ТIаса бащанани мун мекъса кколеб
Квешлъи гIодоб тезе ияхI дур гIолищ.

Нагагь балагь щвани гьалаглъичIого
Рец гьабун кIалъазе сабру дур гIолищ
ГIакълуги къуватги цебеги гьабун
Ццин нахъе тIамизе хIал дур бергьунищ.

ГIадилав ханасул бацIадаб калам
Къойилго цIализе мун гIедегIулищ
ТIокI Гьавун вижарав хирияв ХIабиб
Къварид гьавичIого чIун бажарулищ.

Умумузул нух ккун цеве унелъул
Исламалда гьечIел гIадатал толищ
ЦIияб гIасруялъул квешал гIадатал
ГIадахъ росичIого гIодорго толищ.

Кинан бугониги тIасса жиб бугеб
Дунял гIадахъ босун воре хьвадуге
ГIадатазда рекъон дунялги гIуцIун
Ахираталъул рукъ мукъсан гьабуге.

Бицунилан гуро черхалъул гIамал
ГIамал загIиплъиялъ кIалъалев йиго
Малъулейин гуро нуж киназдаго
Диего насихIат гьабулей йиго.

ПАТIИМАТ ГIАБДУЛАЕВА УНСОКОЛО РОСУ