Аслияб гьумералде

Хваразул ругьел

Хваразул ругьел

Гьанир ханзаби гьечIо,

ЧIахIиял хъулбиги ран,

Хинал рукъзазда жанир,

РахIат босулел гьечIо.

 

Гьанир шагьарал гьечIо,

Хъил тIураб нух бихьичIо,

«Иномаркаги» рекIун,

Хьвадулев чиги гьечIо.

 

Хур бекьулев ватичIо,

Вецарухъан вихьичIо,

ГIи-боцIи хьихьулелги,

Дандего чIвалел гьечIо.

 

Ракьал кколев ратичIо,

Чидае зарал гьечIо,

ЖахIда-хIусуд гьабулел,

ЧагIиги гьанир гьечIо,

 

Гьаниб дагIба-къец гьечIо,

Бикъулев чи дандчIвачIо,

ЧIвадари рагъги гьечIо,

ЧIухIа-къули бихьичIо.

 

Бечедав-мискинавин,

РатIа рахъулел гьечIо,

Хирияб квана-гьекъон,

РетIа-къарав вихьичIо.

 

Дуй кумек гьабулев чи,

Гьанив вихьизе гьечIо,

ЧIаго дуца гьабураб,

ЛъикIлъи дуе хвасарлъи.

 

Дунялалда гьабураб,

Гьаниб роцада лъола,

ЛъикIабгун квешаб гIамал,

ЦIадирабазда цIала.

 

ЛъикIлъи гIемер гьабурав,

Алжаналъуве уна,

Квешлъиялда хьвадарав,

ЖужахIалъув рехула.

 

Дунял тун арал нижер,

Нужеде гьари буго,

Ахират кIочон тараб,

Дунял гьабугейилан.

 

Шагьадат дуца битIун,

Бусурманчи вукIа мун,

Какарал гIамалал тун,

Тавбу гьабунги хьваде.

 

Исламияб диналъул,

Аслаби лъан вукIа мун,

Имангун, Ислам, ИхIсан,

Черхалда щула гьабе.

 

Исламалъул рукнаби,

МухIкан тIуразе гьаре,

Шагьадат цебе битIун,

Къол щуябго какги бай.

 

Дурго боцIи-мал борцун,

Закат кьезе кIочонге,

Рес бугони хIеж гьабе,

Рамазаналъ кIалги кквей.

 

Зикру бачин даимлъун,

Свалават битIун вукIа,

Къуръан гIемераб цIалун,

ДугIа хIелараб гьабе.

 

ГIадамалъ берцин хьваде,

Хъизангун рекъон вукIа.

Чидае кумек гьабун,

Гьесул ракI бохизабе.

 

ХIалалаб ризкъи дуца,

Дуего тIалаб гьабе,

Диналъе мукъсанлъулеб,

ТIасан ккараб гьабуге.

 

Мажгитал, нухал, кьоял,

Иццазе садакъа кье.

ЖамагIат-какде хьвадун,

Кири цIикIкIине гьабе.

 

Киналго гьел гIамалал,

Хасияталлъун гьаре.

Хвалил кьогIлъи рекIелъ ккун,

Аллагьасе хIеле мун.

 

Дур рекIелъ иман цIикIкIун,

Парзгун суннатги тIубай,

Аллагьасул рахъалъан,

Алжан дуй насиблъаяв.

 

Жакъа чIаго вуго мун,

Дунялалъул канлъигун.

Метер нижер мухъазулъ,

Хоб дуй букIин хIакъаб жо.

 

Ниж цере арал руго,

Хадур нужги рачIина.

Нижер заназда хьолбохъ,

Нужерги эхетила.

 

Нуж жеги рухIгун руго,

ХIелизе заман буго.

Аллагьасде гьарде нуж,

ДугIа къабул гьабеян.

 

Хваралгун чIагоязда,

ГурхIел гьабе, БетIергьан.

Ахираталъул рокъор,

Алжан насибал гьаре.

 

Сулайман МухIамаднуров

 

2026-03-15 (Шаввал 1447 с.) №6.


НуцIби рагьун рукIаго, гIедегIе

ГIадамаз гIемер ракIалде щвезабула жидерго гIолохъанлъи. Гьел ракIалдещвеял гвангъарал ва рохалилаллъун рихьизе бегьула гIолохъанлъи нилъер къуваталъул ва чIаголъиялъул цIураб мех букIиналъ.   Амма гIолохъанлъиялъул щибаб ракIалдещвеялъ гуро рохел кьезе кколеб. ГIолохъанлъи мунагьазулъ ва...


СВОялъулазе кумек гьабу-ралъухъ медал

Хасаб рагъулаб операциялъул гӀахьалчагӀазе гьабураб ва гьабулеб бугеб квербакъиялъухъ жамгӀияб шапакъат кьуна Дагъистаналъул муфтиясул гӀакълучи ГIайна ХIамзатовалъе.   РФялъул «Хранители России» абураб жамгӀияб гIуцIиялъул хӀукмуялдалъун гьелъие кьуна «За вклад в победу СВО» абураб...


БачIине бугеб къо

Бусурбабаз иман лъезе кколелдасан буго Къиямасеб къоялъ щибаб махлукъат Аллагьас ﷻ гIарасаталде бахъинабизе бугеблъиялда. Дунялалда нилъ руго заманалъ гIумру гьабизе риччараллъун.   Нилъер иманалъул аслияб магIнаялъул цояб ккола: «Инсан хвезе вуго дунялалда жинца гIумру гьабураб хIалалда ва...


РитIухълъиялъул аслу

Халкъазда цебечIарал масъалабазул цояб ккола адаб гьечIолъи. Хасго гьеб загьирлъула гӀолеб гӀелалда гьоркьоб. Адаб-хӀурмат, яхӀ-намус ккола сахаб жамгӀият букIиналъе лъолеб кьучӀалъул цояб. ГIемерисел масъалаби, захIмалъаби, ритӀухълъи гьечIолъи бугелъулха адаб гьечIолъиялъул...


Иргадулаб кумек

Хасавюрт районалъул ва шагьаралъул имамзабазул советалъул председатель Аргъваниса МухIаммадил хIаракаталдалъун, иргадулаб кумек битIана СВОялда ругел нилъер рагъухъабазе. Районалъул имамзабазул советалъул председателас, гьеб лъикIаб ишалда гIахьаллъи гьабунщиназе, ракI-ракIалъулаб баркалаги кьун,...