ГIумрудул гIажаиблъи

Унго, гӀажаиблъи гьаб гӀумруялъул,
ГӀадан херлъанагӀан хиял цӀилъулеб;
Хвел гӀагарлъанагӀан гӀишкъу цӀикӀкӀунеб,
ГӀедегӀун анагӀан инсан вохулеб.

ГӀадан гӀорцӀулареб, боцӀи гӀолареб,
ГӀарцуй лагълъи гьабун лугби херлъулеб.
Хвезе вижун вукӀин лъалеб мехалъги,
ЛъикӀлъиялдехун ракӀ гӀедегӀулареб.

Унго, гӀаламалъи гӀамалалъулги,
ГӀумру дагьлъанагӀан дунял бокьулеб.
Давлат хӀаллъанагӀан хӀажатавлъулеб,
ХӀал хьадарлъанагӀан хьул халалъулеб.

ХӀикмалъиго кинаб гьаб хӀаяталъул,
ХӀалхьи гьечӀеб ракӀалъ рахӀат толареб.
РахӀму гьечӀолъи гьаб дунялалъулги,
Гьалбал жиндир гьундухъ гьалаг гьарулеб.

Унго тамашалъи яшавалъулги,
Жиб язихълъанагӀан яхӀ бечелъулеб.
Бечелъи щванагӀан чи ягъзинлъулеб,
Чанги янгъизасе ярагьунареб.

ГӀажаиблъи кинаб цин-цин гӀумрудулъ,
Цо-цо гӀадамазул гӀамалалъулги,
ГӀумрудул цоги сон тӀаса бекидал,
Баркун кверал росун кепал гьарулеб.

САГӀИД ОРДАШОВ