ГIумрудул нухал
ГIумрудул нухал
Аллагьас нилъее кьураб гьаб гIумру,
МагIарде рахунеб нухда релълъуна.
Жакъа цо гали лъун, метер свери тун,
Тирун ун рахуна гIумрудул гохIде.
Щивав инсанасе Аллагьас сонал,
Зарраялда хъвала гьел рижилалде.
Борхалъуде унел гIумрудул сонал,
Сверула къокъазде ва халатазде.
Цо-цо инсанасул гIумрудул къоял,
Канлъи бихьичIого берал къанщула,
ГьитIинлъи, лъимерлъи гIанчIлъи щвечIого,
ГIодулей эбел тун вачуна хвелалъ.
ГIолохъанлъиялъул къуват чорхолъгун,
Чармил ракI бугелги ккола кIичIикье.
Хъизан-лъимал гьарун рохун рукIарал,
Ракьул чохьонир лъун рихьулел гьечIищ?
ВатIаналъе гIоло, диналъе гIоло,
ГIодобе би тIола шагьидзабаца.
Аллагьас гIумру кьун херлъи бачIарал,
Беццал, гIинкъал лъугьун хIал тIагIун хола.
Сонал гIемерал кьун гIумру бихьарал,
ГIумрудул тIогьазде тIаде рахуна.
Дунялалъул тIагIам гьелъул берцинлъи,
Доба нахъаги тун рагIалде щола.
Нилъер гIумруялъул хIисаб гьабидал,
Бихьизе берцинаб дунял гьечIищ гьаб?
Пикру гьабуразе гьаб нилъей гIумру,
Аллагь вокьизелъун кьун бихьуларищ?
Кинабго дуниял, гьалъул хIикмалъи,
ХIалкIолев Аллагьас бижи хIакълъула.
Дунялалъул берцинлъи, гьелъул бечелъи,
Аллагь, Дур къуваталъ кьун буго нижей!
Дунялалда къоял дагь жидей кьурал,
Мунагь-хатIа дагьгун хвел щварал руго.
ГIумрудул сонал кьун дунял бихьарал,
Аллагьасе тIагIат гьабизе тарал.
Гьаб берцинаб дунял нилъее кьурав,
Аллагьасе хIелун дугIа гьабилин.
ГIумруялъул нух тун борхалъи щварал,
Тавбу къойил гьабе БетIергьанасе.
