Нилъер гIумру

Нилъер гIумру

Церекъад – гьитIинав лъимер вукIарав,

Сон – гIолохъанлъигун къуватаб заман.

Херлъиялъ къвал бараб жакъасеб къоги,

Метер – зонода тIад цIар хутIила дир.

Сверухъе балагье, хабзалахъе щва,

Хварал гIемер гьечIищ, чIагояздаса?

Эбел, эмен, вац, яц, гIагарлъи тIагIун,

Нилъго хутIун гьечIищ, рекIелгъей тIагIун?!

Гьаб дуниялалда гIумрудул сонал,

Рогьун, рукIкIун, сардал, къояз рорцунел.

ГьитIинал, гIолилал, хералин абун,

ЛъугIун унеб гIумру, тIагIунел къоял.

Гьадин къокъаб заман гьаб дунялалда,

Щай къварид биччалеб гIадамил лъимер?

ВахIшилъи, рагъал, кьал, цоцалъ гьаб дагIба,

Квешал пишабазде щайдай нилъ унел?

Гьудуллъи, гьалмагълъи,  цоцалъ гьуинлъи,

Берцин бихьуларищ гьаб дунялалда?

ХIеренлъи, хIалимлъи, берцинаб рагIи,

Бокьулеб куцха гьеб нилъер ракIазе.

Дунялалда  балеб дагьаб замана,

РакIал цоцалъ журай, жахIда жибго те!

ЛъикIалъе рецц гьабе, квешаб кIочон те,

Иман щула гьабун ракI бацIцIад цIуне.

Рагъаразда гьоркьоб маслихIат гьабун,

Унтарасухъе щва  сахлъиги гьарун.

Мискинасе кумек, садакъа гьабе,

Гьелъ берцин гьабулин нилъер гьаб гIумру.

Кидаго нилъее гIумрудул къоял,

Цо бакIалъ чIоларо, нахъруссунаро.

ГьитIинал рукIарал кIудиял гIола,

Херлъи тIаде щола, гIумру лъугIула.

Жакъа дунялалда, метер хабалъги,

Гьабураб лъикIлъи дур лъикIаб рахъалда.

Дунял гьаниб тезе букIин кIочонге,

ГIумру лъикI тIобитIе вацалгун яцал.

Сулайман МухIаммаднуров, ЦIиликь росу