Загаралъул пайда ва зарал
ПастIан гьуинаб ва кваназе лазатаб нигIмат. Гьеб кваназе бегьула гIатIгоги батIи-батIияб къагIидаялда кванилъ хIалтIизабунги.
Гьеб буго чорхое кутакалда пайдаяб тIагIам, гьелъулъ руго рикIкIен гIемерал витаминалгун пайдаял гIуцIаби.
С витаминалъул къадар цIикIкIараб букIиналъ чорхол цIуниялъулал функцияби щула гьарула ва вирусалъулал инфекциябазда дандечIезе кумек гьабула.
А витаминалъ тIом цIунула ва хъарсун, къотIун зарал ккараб мехалда гьеб хехго сахлъизе кумек гьабула.
Антиоксидантаз ва А витаминалъ кумек гьабула катаракта гIадал беразул унтаби ккеялъул хIинкъи дагьлъизабизе.
Калий ва магний гIадал гIуцIабаз бидул тIадецуй низамалде бачуна, гипертониялъул хIинкъи дагь гьабула ва холестериналъул даража гIадатияб хIалалде бачуна.
ПастIаналъулъ бугеб клетчаткаялъ лъикIлъизабула кванирукъалъул хIалтIи ва кумек гьабула бакьазул хIалтIи гIадатияб хIалалде бачине.
Гьелда жанир ругел антиоксидантаз клеткаби зарал ккеялдаса цIунула, цIунарал унтаби ва рак ккеялъул хIинкъи дагь гьабула.
ЛъикIаб асар гьабула бихьиназул сахлъиялъе, хасго нервабазул гIуцIиялъе.
Руччабазе
Антиоксиданталгун витаминаз бечедаб букIиналъ руччабазул сахлъиялъеги лъикIаб асар гьабула.
Фолиевая кислота абураб пастIаналъулъ бугеб гIуцIиялъ кумек гьабула чIужугIаданалъул сахлъиялъе, хасго лъимаде йигеб заманалъ. Гьелъ квербакъула ургьиб бугеб лъимералъул рижин гIадатияб къагIидаялъ лъугьун цебетIеялъе.
Лъималазул кванил нигIматазулъ пастIан ккола сахлъиялъе кутакалда пайдаяб тIагIам. Иммунитеталъеги асар гьабула гьелъ.
КигIанасеб къадаралда кваналеб? Бищунго цIикIкIун пайда щвезе ккани, лъикIаб букIуна пастIан цIияб кваназе. Анкьида жаниб чанго нухалъ рекъараб къадаралда кванаялъ черх витаминаздалъун ва минералаздалъун хьезабула. ЧIахIиязе рекъараб къадар буго 200-300 грамм.
Гьунаб нигIмат букIиналъ цIодорлъи гьабизе ккола аллергия букIунез, чакрил диабеталда хадуб хъаравуллъи кколез, кванирукъалъул сахлъи загIипаз.
Аллагьас ﷻ чорхое пайдаяб ва сахлъи кьолеблъун гьабеги кваналеб нигIмат.
