ГIалим КъурамухIаммад-хIажи

ГIалим КъурамухIаммад-хIажи

Дунялалъулъ паналъун Аллагь кIочараб къавмалъ,

Ишаналъе росарал васал гIемерал ккана.

ГIарцухъ намус бичарал иман гьечIел шайтIабаз,

Щибниги гIайиб гьечIел гIолохъаби кIурана.

ЧIикIаса СагIид-апанди

2007 соналъул 26-абилеб июлалда, боголил какги мажгиталда бан, рокъове унаго нухда шагьидлъана Дагъистанги, Россияги, гIарабазул пачалихъалги жиндие мукIурав гIалим, ЦIунтIа районалъул Зехида росулъа КъурамухIаммад-хIажи. Гьесдаго цадахъ шагьидлъана гьитIинав вац ГIабдуллагь-хIажиги. Жиндир гIумру ислам тIибитIизабиялда арав, Аллагьасул ﷻ хIакъаб дин халкъалда малъиялдаса цебесеб жо жиндир букIинчIев гIалимчи накълулъана чияр квердаса.

 ТIолго гIаламалъе ккараб ками бихьизабулеб буго КъурамухIаммад-хIажи накълулъун хадуб ЧIикIаса СагIид-афандияс (живгоги шагьидлъарав) хъвараб назмуялда.

Нилъер заманалъул имам Навави

Заманалъул Навави, исламалъул бахIарчи,

КъурамухIаммад ана хIурулгIинзабаз вачун.

ХIасадалъул агьлуялъ къор жиндий гъунаниги,

Къадирасул хIукму щун шагьидлъана багьадур.

ШаргIалъе хъулухъалъе хадимлъун чIарав мудир,

ГIаламул Мулкалдаса Малакуталде щвана.

Дунялалъул гъоб рокъоб рахIат дуца гьабичIин,

Гьанже воржанхъе, лачен, Алжаналъул пастIабахъ.

Агьлуллагьазул хьибил дуца гьитIинго ккунин,

Гьанже хьваде бокьухъе, рокьанщиналгун цадахъ.

Шайихзаби разияв муридги мун вукIанин,

ВукIа гьанжеялдаса гьезул зумраталда гъоркь.

ДунгIан БетIергьан Аллагь разияб хIалги лъугьун,

ХIазратул Къудусалда макъам дуе гьабеги.

Дуца гIелму малъарал гIолилазул къокъаби,

Къудраталъул Аллагьас баракат лъун цIунаги.

Баркат гьечIеб къавмалда къагьруялъул цIал щваги,

ЦIоб гIатIидав Аллагьас динул ислам цIунаги.

Дунялалъул абнаал элда машгъуллъун тайги,

Тавбу анищ ккаразул курмул гIатIид гьареги.

Диналъул цIогьабазе рахчизе бакI тIагIаги,

Бахчун рекIелъ цIунараб нифакъ бакъалда байги.

Ракъи-къечалъул балагь умматалде щогеги,

Шугьадаазул баркат аниб хутIун батаги.

Дун дуда бахиллъула ахираталъул гIалим,

Исламалъухъ рухIги кьун ХIабибгун ﷺ данделъарав.

ХIайранлъиларев кинан дур къокъаб гIумруялда,

ГIасруялъ баччулареб раччи жиндилъ борхараб.

Хвелги гIолохъабазе – херлъи гьечIеб чIаголъи,

Халкъалъ баркала кьураб сират нахъе хутIани.

Хобги шугьадаазе – алжаналдаса цо ах,

Аллагь РахIман разилъун хIурулгIинал къачIараб.

ХIабиб цIунарав имгIал Абу ТIалиб къанщидал,

Къурайшияз кутакаб тIадецуйги гьабуна.

Гьесие заралалъе ургъичIеб макру течIо,

Аллагьасул макруялъ кинабго къватIиб чIвана.

Кинаб хIажат кканиги ХIабибасе ятарай,

ХIал бащадай вазирлъун даимго хьолбохъ чIарай,

Уммагьатул муъминин Хадижатун Кубра хун,

Халкъалъул хириясде гьеб мусибатги щвана.

Шугьадаазул сайид УхIудалъул къояца,

ХIамзат ватIалъидалги ТIагьал хьибил бухIараб.

ХIабибас гьеб кинабго каранда жаниб лъураб,

Купруги басра гьабун исламги тIибитIараб.