ГIамал цIикIкIинабулеб моцI
ГIамал цIикIкIинабулеб моцI
Хирияб рамазан моцI тIаде щведал, щивав муъминчиясул ракI цIилъула рохелалъ. Гьаб моцI нилъее буго гIицIго кванил нигIматаздаса инкар гьабилъун гуреб, Халикъас кьураб баракат гьарзаяб сайгъат, рухIияб бечелъи тIегьалеб заман, ТIадегIанасул гурхIелалъ махлукъат сверун ккураб гIуж.
Хирияв аварагас ﷺ абун буго: «РекIелъ имангун, Аллагьас кири гьабиялде хьулги лъун, рамазан моцIалъ кIал ккурав чиясул мунагьал чурула», - абун. (Бухари, Муслим).
Гьаб буго Алжаналъул каваби рагьулеб, жужахIалъул нуцIби рахалеб, шайтIаби рахсазда ралеб моцI. ШагIбан моцIалъул ахирисеб къоялъ умматалде хитIаб гьабун Аллагьасул Расулас ﷺ абунин Салманул Фарисиясдасан бицун буго: «Нужехъе бачIана кIудияб, цIакъ баракатаб моцI, жиндилъ азарго моцIалдасаги хирияб сордо бугеб. Гьеб моцIалъулъ Аллагьас ﷻ тIадаблъун гьабун буго къад заманалда кIал кквезе, сардилъ таравихIалъул суннатаб как базе. Гьеб моцIалъ жиндиего бокьун лъикIаб гIамалги гьабун Аллагьасде гIагарлъизе бокьарав чи вугони, гьесие лъагIалил бокьараб цоги заманалда паризаяб гIамал гьабураб гIадаб кири букIине буго. Паризаяб гIамал гьабурасе 70 парз тIубазабураб гIадаб кири щола. Гьеб буго сабруялъул моцI, унго-унгояб сабруялъе жазаъги Алжан буго. Гьеб буго гурхIел-рахIмуялъул моцI. Гьеб буго жиндилъ унго-унгояв муъминчиясул лъикIаб гIамал цIикIинабулеб. КIал ккурав чи, кIал биччалеб мехалда кваназавурасул мунагьал чурула, жужахIалъул цIаялдаса хвасар гьавула, гьесие ккураб кIалалъухъ щваралда релълъараб кириги щола, досие щвараб дагьабниги мукъсанги гьабичIого. Гьеб буго жиндир тIоцебесеб бащалъи Аллагьасул гурхIел-рахIматлъун бугеб, кIиабилеб - мунагьал чурилъун, ахирисеб бащалъи - жужахIалъул цIаялдаса хвасарлъилъун бугеб…», - абун.
ХIадисул къудсиялда ТIадегIанав Аллагьас ﷻ абун буго: «Адамил лъимадул щибаб гIамал буго жиндиего гIоло гьабулеб, кIал хутIизегIан, гьеб Дие гIоло гьабулеб буго, гьелъухъ жазаъги Дица гьабила», - абун. Гьелъие баян гьабун гIалимзабаз хъван буго, кIалалъухъ лагъасе гьабизе бугеб жазаъ бугин гьедигIанги кIудияб, цохIо Аллагьасда ﷻ гурони жиб лъалареб абун. КIал ккурав чиясе буго кIиго рохел: кIал биччалелъул ва БетIергьангун ﷻ данделъараб мехалъ.
