ЧIухIи гьабиялъул зарал
ЧIухIи гьабиялъул зарал
Хириял диналъул вацал ва яцал, цоги нухалда ракIалде щвезабизе бокьун буго чIухIи гьабиялъул бугеб заралалъул хIакъалъулъ.
Дида ккола чIухIи бугин иман загIипав, жагьлу цIикIкIарав чиясул гIамал. Аллагьас ﷻ нилъ рижун руго лъел къатIраялдаса. Руссинеги руго цого къагIидаялъ ракьулъе. Нилъер къаркъалабиги туризе руго. Гьединав чи щайха чIухIулев?
ЧIухIи гьаби ккола нилъеца гьабураб лъикIаб гIамал бухIулеб жо. Къуръаналда абулеб буго (магIна): «Мун ракьалда хьвадуге чIухIун, дуца ракьги бихъичIо гьелъул тIиноялда ваккизелъун ва мугIрузул тIогьивеги вахинчIо дурго халалъиялъ», - ин (суратул «Исраъ» 73 аят).
Имам Муслимица бицараб хIадисалда буго: «Алжаналде лъугьунаро рекIелъ чIухIиялъул цо заррагIанасеб жо бугев чи», - ян.
Жакъа гIалимзабаз гIемерал насихIатал гьарулел руго, амма нилъеца гьеб къабул гьабулеб гьечIо. Щайгурелъул нилъ чIухIи абураб унтуца унтун рукIун.
Паналъулеб жоялдалъун чIухIи гьаби кутакаб жойищ бугеб, чIухIарав чи гIодовегIан гьавичIого теларин Аллагьасги абун букIаго. Жиндие гIоло дунял бижарав МухIаммад ﷺ аварагас щайха гьабичIеб дунял? Аварагас ﷺ жиндаса рухI батIалъилелде, кисиниб хутIараб анкьго диргьам садакъаде кьейин абун буго.
Абубакар-асхIабас абун буго нуж цIунейин чIухIиялдаса, ракьалдаса вижарав, ракьулъе вуссине ва ракьулъ бугеб хIапараялъ кваназеги вугев чи кинин чIухIулевин абун.
Имам Гъазалияс абун буго, чIухIи кколин чиясда жиндаго жив кутакав чилъун вихьи. Гьединас абулин «дунго дунилан». Гьебги бугин иблисалъ абураб жо, Адам аварагасе сужда гьабейин абун амру гьабидал.
Аллагьас ﷻ нилъ киналго гьелдаса рикIкIад гьареги.
