Бищун бигьаяб гIибадат
ТIадегIанав Аллагьас жиндирго цIобалдалъун лагъзадерие кьуна гIакълуги, пикруги. Гьеб хIалтIизабизе лъани, инсан кIиябго рукъалъулъ талихI бугевлъун вукIуна ва Аллагь лъаялде щвеялъе сабаблъунги ккола.
ТIадегIанав Аллагьас бижараб кинабниги махлукъаталъул пикруги жидеца гьабулел, даимго Аллагьги рехсолел гIадамазул хIакъалъулъ рещтIана хадусеб аят: «Гьел гIадамал руго, жидеца Аллагь рехсолел рахъун чIун какилъги, гIодор чIун мажлисалдаги, регун хьибилалдаги, гьединго жидеца пикруги гьабулел зобал-ракьазул ва гьезда жаниб бугеб махлукъаталъул. Гьедин пикруги гьабун жидецаги абулел: «Я нижер БетIергьан! Гьал зобал-ракьал Дуца гIадада рижарал гьечIо, нижеца Мун вацIцIад гьавула, Дуе рекъоларел, батIулал киналниги сифатаздаса. Дуца ниж цIуне Дур махлукъаталъул пикру гьабуларезе хIадурараб цIадул гIазабалдаса», - ян. ТIадегIанав Аллагьас Къуръаналда жиндир махлукъаталъул пикру гьабеян абуна, жиндир заталъулъ пикру гьабеян абичIо, щайгурелъул инсанасул гIакълуялда Аллагьасул заталъул пикру гьабун, гьелда нахъ гIунтIизе хIал кIоларо. Гьелъие гIоло буго хирияв Аварагас ﷺ хIадисалда абун: «Нужеца пикру гьабе Аллагьас бижараб махлукъаталъулъ, живго Аллагьасул пикру гьабуге» - абун. Цогидаб хIадисалда буго: «ТIадегIанав Аллагьасул махлукъаталъулъ цо сагIаталъ пикру гьаби хирияб буго, лъабкъого соналъ гьабураб гIибадаталдаса», - ян.
Жинда Аллагь разилъаяв Абул-ХIасан Щазалияс абун буго: «Цо дагьаб ракIазул гIамал, ай пикру гьаби лъикIаб буго, мугIрул гIанасеб, черхалъ гьабулеб гIемераб гIамалалдаса», - ян. Гьединго гьес абуна: «Пикру гьабиялъ ракIалдаса гъафлат ине гьабула, Аллагьасдаса хIинкъиги цIикIкIине гьабула», - ян. Жинда свалат-салам лъеяв аварагас абуна: «ТIадегIанав Аллагьасул махлукъаталъул пикру гьабиялдаса кIудияб, тIадегIанаб гIибадат гьечIо», - ян.
