Аварагас ﷺ васият гьарурал...

Аварагас ﷺ васият гьарурал...

Хирияв авараг ﷺ вукIана кидаго нилъ тIоритIулевлъун, нилъее насихIатал гьарулевлъун. Гьелдаго цадахъ малъулеб букIана ккараб бакIалда сабру гьабизе ва гьарулел ишазулъ Аллагьасул ﷻ рахъалдаса кумек щвезелъун хасалгун гIаммал зикраби-дугIаби гьаризе.

Нилъеда гIемер рагIараб машгьураб хIадисалда буго дугIа - муъминчиясул ярагъ бугин абун. ХIадисул къудсиялда ТIадегIанав Аллагьасги ﷻ абулеб буго: «Дир тIадегIанлъи-кIодолъиялдалъун гьедула, лагъзадерил цонигияс ракI-ракIалъго Дидаса ﷻ кумек тIалаб гьабидал, зоб-ракьалъул агьлуго гьесие хIилла гьабизе лъугьаниги, Дица ﷻ гьесие кумек гьабичIого теларо», - ян.

Гьединлъидал, бокьун буго аварагасги ﷺ гIемер такрар гьарулел рукIарал, нужецаги гьареян васият гьарурал гьезул чангоял рехсезе. Аварагас ﷺ абун буго: «Щибаб рогьалил какда хадуб гьаб анцIго рагIи абурав чиясе, Аллагь ﷻ кумекалъе, гьабулеб ишалъе хIалай чIола ва разиги вукIуна. Гьезул щугояб буго дунялалда бугеб, хутIараб щугояб ахираталъе руго. Гьелги гьал руго:

«ХIасбияллагьу ли ддини» (магIна): «Аллагь ﷻ вуго дир диналъе гIей гьабулев».

«ХIасбияллагьу лима агьаммани» (магIна): «Аллагь ﷻ вуго дир ургъел ккараб жоялъе гIей гьабулев».

«ХIасбияллагьу лима багъа гIалая» (магIна): «Дида зулму гьабурасе данде Аллагь ﷻ вуго дие гIей гьабулев».

«ХIасбияллагьу лиман хIасадани» (магIна): «Диде хIусуд гьабурасде данде, дие гIей гьабулев Аллагь ﷻ вуго».

«ХIасбияллагьу лиман кадани биссуи» (магIна): «Квешлъиялдалъун диде гIагарлъарав чиясдаса дие гIей гьабулев Аллагь ﷻ вуго».

«ХIасбияллагьу гIиндал мавт» (магIна): «Хвалда аскIоб дие гIей гьабулев Аллагь ﷻ вуго».

«ХIасбияллагьу гIиндал масъалати фил къабри» (магIна): «Хабалъ суалал кьолелъул дие гIей гьабулев Аллагь ﷻ вуго».

«ХIасбияллагьу гIиндал мизан» (магIна): «ГIамалал цIалелъул цIадирабазда аскIов дие гIей гьабулев Аллагь ﷻ вуго».

«ХIасбияллагьу гIинда ссиратIи» (магIна): «СиратI бахунелъул дие гIей гьабулев Аллагь ﷻ вуго».

«ХIасбияллагьу ла илагьа илла гьува гIалайгьи тавакалту ва гьува раббул гIаршил гIазими ва илайгьи аниб» (магIна): «Аллагь ﷻ вуго дие гIей гьабулев, кIудияб, тIадегIанаб ГIаршалъул бетIерлъун вугев, жиндие лагълъи гьабизе кколевги Гьев ﷻ гурони гьечIо, Гьесде ﷻ буго дир ахир вуссинги», - ян.

Аварагас ﷺ гIемер гьабулеб букIараб дугIаялдаса буго Къуръаналъул аятлъунги жиб кколеб: «Раббана атина фи ддуня хIасанатан ва фил ахирати хIасанатан ва къина гIазаба ннар» (магIна): «Я, дир БетIергьан ﷻ, нижее дунялалдаги ахираталдаги лъикIлъи кье, жужахIалъул гIазабалдасаги хвасар гьаре», - ян.

Аллагьас ﷻ нилъ дугIа къабулазда гьоркьоса гьареги. Амин!