Ургъел гьабун бечелъи щварал
Ургъел гьабун бечелъи щварал
Къуръаналда рехсон руго цере рукIарал умматазул гIемерал къисаби. Гьелги рехсон руго нилъер ракIазе асар гьабизелъун ва мисаллъун рукIине. Гьединго ТIадегIанав Аллагьас ﷻ Къуръаналда, Аварагасде вуссун, абуна: «Гьал къисаби рехсана дур диналда ракI щулалъизе букIине», - ян.
Гьаб къиса нилъее битIараб нияталъе сабаблъунги батаги.
Бану Исраилазул заманалда иман бугел лъикIал рос-лъади рукIана. Гьезул заманалъул аварагасухъе ТIадегIанав Аллагьас ﷻ вахIю битIула дуца гьезда абейин гьезул бащдаб гIумру бечелъиялда ва бащдаб гIумру мискинлъиялда ине букIинелъун Дица къотIи гьабунин абун. Росас, херлъараб мехалда букIине, бечелъи тIаса бищула. Щайин абуни, херлъидал гIарац сабаблъун (гьеб тIалаб гьабулаго) гIибадаталдаса машгъул гьавичIого вукIине. ЧIужуялъ бечелъи гIолохъанлъиялдаго тIаса бищула. Щайин абуни, гIолохъанаб заманалда гIибадат гьабизе бажарулеб букIун. Херлъидал рекъолелъулха дунял тун Аллагьасде ﷻ руссине. Гьеб жаваб бихьидал ТIадегIанав Аллагьас ﷻ Аварагасухъе вахIю рещтIинабула ва абула гьезда абейин: «Нуж кIиязго Дие гIибадат гьаби тIаса бищидал ва цIахъ бахъидал Дица нужер кинабго гIумру бечелъиялда тIамизе хIукму гьабуна, нужее дунялги ахиратги щвезе букIине», - ян.
Къисаялъ нилъее баян гьабула рос-лъадуе гIарцул ургъел букIинчIеблъи. Гьезие ургъел букIана гIолохъанаб ва херлъараб заманалда гIибадат гьабиялъул. Гьединаб ургъел гьезул букIиналъ, ТIадегIанав Аллагьас ﷻ тIубараб гIумруялъ гьезие бечелъиги кьуна.
