Мунапикъзаби рокьиялъул хIасил

Мунапикъзаби рокьиялъул хIасил

ХIурматияб «Ас-салам» казият цIалулезул жамагIат. Дунялалъул гIадат буго лъикIалгун квешал гIадамаз цоцалъ журан гIумру тIамулеб. Квешаздаса лъикIал ратIа гьаризе лъугьинги, гьединго, гIаксалдаги бугеб къасд гIададисеб жо буго. Нагагь гьедин гьабизе бажараниги гIумру-яшав цадахъ гурони лъугьунаро. Гьеб иш лъан хадуб нилъеца балагьизе ккола квешалин абулел гIадамазулгун кинаб гьоркьоблъи гьабизе кколебали.

Квешалин рикIкIунел гIадамазулги бусурбанчиясе чанго батIияб тайпа букIина. Масалалъе, бусурбаби гурел цоял, гьезда гьоркьорги исламалъе кIвараб зарал гьабизе ургъулел цогидал. Гьединго бусурбабиян цIар бугел, амма гьабулеб хьвада-чIвади капурзабазулалдасги нахъегIанаб, зулму гьаби, цIогьоди, бусурбанчиясе гъара гьаби, гьев гъоркье рехи сурараб ишлъун жидее гьечIел.

Квешал гIадамазул зарал гьечIого букIинаро, амма бищунго жамгIияталъе зарал бугел ккола бусурбабазул цIаралда гъоркь хьвадулел бидгIачагIи, ай вагьабиял гIадал, гьединго гIалимзабазде, устарзабазде данде рахъарал мунапикъзаби. Гьединал гIадамал раккиялда щибго гIажаиблъизе жо гьечIо. Щайгурелъул Бичасул авараг ﷺ чIаго вукIаго гьесде данде рахъарал бусурбабилъун рикIкIунел мунапикъзаби рукIиндал. Мунапикъзаби камун дунял букIунареблъи лъан хадуб нилъее чара гьечIого къваригIуна гьел ратIа рахъизе лъаялдаго цадахъ гьезулгун кинаб гьоркьоблъи гьабилебали бичIчIиги.

ЛъикIал гурел гIадамазулгун гьабулеб гьоркьоблъиялъул хIакъалъулъ Къуръаналда буго: «Нуж гьетIуге, ай цIакъго гьудуллъи гьабун аскIоре къаге залимзабазде, ай квешал гIадамазде. Гьедин гьабуни нужедаги хъатIила жужахIалъул цIа», - ян.

Гьаниб бицинчIого гIоларо гьабсагIат нилъер халкъалда гьоркьоб гIадатияб жолъун лъугьун бугеб хIалалъулги. Масала, киназдаго лъалев, машгьурав, цо лъикIаб гьечIеб хьвадиялъул, зулмуялъул инсан яги мунапикъ вукIуна. Балагьараб мехалда гьесулгун лъикIаб гьоркьоблъиялда рихьула диналда тIадчIеялдалъун машгьурал цо-цоялги. Гьедин щайин гьикъизеги рес гьечIо, гьеб бакIалдаго абула жидеда цебе квешлъи гьабуларин гьес абун. КигIан бокьун бугониги, гьеб пикруялда разилъизе бажарулеб гьечIо. ХIакъикъаталдаги квешлъи гьабулев чи вукIинги лъалаго, гьес тавбу гьабун вуссунги гьечIеб мехалда, гьесулгун рокьа-хинлъи гьаби, гьесул квешлъиялда тIад рекъейлъун гуреб, цоги батIияб куцалда кин бичIчIулеб? Квешлъиялда тIад рекъарав чиги гьесулго гIахьалчи ккеларищ? Гьесдаги жужахIалъул цIадул мацI щунин абун гIайиб бугищха?

Ахиралдаги бицинин, ЮшагI аварагасде Аллагьас вахIю гьабулеб буго, Дица дур къавмалдаса 40 азарго лъикIалгун 60 азарго квешал гIадамал гьалаг гьаризе ругин абун. Цинги ЮшагIица гьикъулеб буго, квешал гIадамал гьалаг гьари бичIчIилин, лъикIалгIаги щайин гьалаг гьарулелин абун. Цинги Аллагьасул рахъалдасан жаваб бачIанила, лъикIалги гьалаг гьарулел ругин квешалгун цадахъ квана-гьекъон, кеп-ихтилаталда, Диде гIасилъиялде ццимги бахъинчIого, гьезда цадахъ рукIаралъухъин абун.

Балагьеха, бусурбаби, квешал гIадамалгун цадахъ рукIиналъул къисматалде.

ГIабдуллагь МухIаммадов