Ахирзаман
Ахирзаман
ХIурматияб диналъул агьлу. Нилъер гIумруялда гIемер батIи-батIиял лъугьа-бахъинал дандчIвала. РахIаталда ругеб мехги букIуна, пашманго ругеб заманги камуларо.
Амма инсанас кидаго тIалаб гьабулеб батула парахалъи, рахIат, эркенлъи. КигIанго нилъее бокьаниги гьединаб мех дунялалда кидаго букIунаро. Гьеб тIалаб гьабиги гIакълуялдаса кколаро. Щайгурелъул букIине къадарго гьечIеб жо балагьи ахIмакъаб пиша кколелъул.
Амма нилъер кколеб жо буго гьеб рахIат кидаго букIунареблъи лъангутIи, гьаб дунял балагь-къварилъиялъул, хIалбихьиялъул рукъ бугин бицаниги нилъее божизе бокьунгутIи, яги гьеб хабаралда божунгутIи. Гьеб гъафлаталдаса нилъ кантIизе, макьидаса рорчIизе рукIине БетIергьанасги гьоркьо-гьоркьоб захIмалъи биччан ракIалде щвезабула гьеб. Гьединаб хIал тIаде бачIиндал нилъ лъугьуна кутакалда рахIатхун, чIвачIвадун, рукIине бакI батуларого, квараб квен эхебе унарого, макьица къо-лъикI гьабун.
Гьеб буго Аллагьас нилъер къисматалде кантIизе гьарураб, цIакъго ахиратгун ахир руссунеб бакI кIоченчIого букIине бугеб лъазаби. Лъиего балъгояб жо гуро ахирзаманалда питнаби гIемерлъиги, рагъ-кьал цIикIкIинги нилъ рорчIулареб иш букIин. Гьеб бакIалда суал баккулеб буго щибха гьабизе кколеб гьединаб заманалдайин абураб.
ТIоцебесеб иргаялда, тавбу гьабизе рекъараб буго. КIиабизе, шаригIат щулаго кквей, ай гIибадат цIикIкIинаби. Зикру-салават, вирдал, Къуръан цIали гIемер гьаби. Халкъалда гьоркьоб унеб къваригIел гьечIеб, пайда дагьаб хабаралде гьоркьоре лъугьунгутIи.
Гьаб ахираб заманалда нилъер рахIат хвезабун буго дунялалда тIад ругел бусурбаби ругеб къварилъи бихьиялъ. Цо бакIазда рагъ-кьал унеб буго, цогидал бакIазда гIадлу-низам биххун, цогидазда ракь багъарун, къварилъиялда руго. Гьединазе гьабизе рес бугел кумеказул цояб буго гьезие рахIму-цIобалъулаб квер бегьи, цогидабин абуни - Аллагьасда гьари гьезда бугеб къварилъи бигьа гьабеян абун. Гьединго, цогидал ресал ругони, гьелги гьаризе бегьула. Амма гьабсагIаталда цогидаб нух бихьулеб гьечIо.
Бусурбанчиясде тIаде кинаб къварилъи бачIаниги гьес цIунизе ккола шаригIаталъул нух. Гьес бугеб ахIвал-хIалалъул киналго рахъал хIисабалдеги росун, шаригIаталъул цIидарабазда лъезе ккола. Исламалъ кинаб рахъ бергьинабуниги гьелда хадувги ине ккола кигIан гьесул гIакълуялда рекъараб гьеб батичIониги. ГIакълуги шаригIатги кидаго гуро цадахъ кколеб. Нилъеда лъикIабин ккараб, амма шаригIаталъ гьукъараб кигIанги буго. Амма хIасил балагьидал, шаригIаталъ малъараб гьабураб кидаго цеб ккола.
Аллагьас киназего сабруги гIибадаталъе къуватги кьеги.
