ГIажаибаб къиса
Цере рукIарал асхIабзабазул, гIалимзабазул къисаби цIалиялъ нилъер ракIал рорчIизарула, кантIизарула. Гьезул къисабазда жаниб нилъее дарсги камуларо.
Цо сордоялъ муъминзабазул амир ГIумар ибн ал-ХатIаб къватIиве вахъуна гIадамазул лъикIал ишазухъ халгьабизе. Шагьаралда сверулелъул гьесда рагIула цо рокъоса пуланаб кIалъай
Эбелалъ абула: «Дир яс, рахьдаде гъорлъе лъим жубай (бичулеб къадар цIикIкIинабизе)», - ян. Ясалъ жаваб кьола: «Я эбел, дуда лъаларищ муъминзабазул амирас гьеб гьукъун букIин», - ян. Эбелалъ абула: «Я дир яс, рахьдалъе лъим тIей, ГIумарида нилъ рихьуларо», - ян. Ясалъ жаваб гьабула: «Я дир эбел, ГIумар-асхIабасда нилъер хIакъикъат лъалеб гьечIониги, хIакълъунго ГIумарил БетIергьанасда лъала! Дун дуе мутIигIлъиларо Аллагьасе гIассилъи гьабулеб жоялъулъ», - ян.
Аллагь разилъаяв ГIумарида рагIула гьеб кинабго ва ясалъул каламалъ гьесие асар гьабула. Гьес жиндирго хIалтIухъан Асламида абула: «Гьаб рукъ ракIалда чIезабе», - ян.
Радал халипас абула: «Я, Аслам, мун доб бакIалде а, лъазабе гьел руччаби щалали ва гьей ясалъул рос вугищали», - ян.
Аслам гьеб бакIалде уна, лъазабула гьел руччаби ХIарам къавмалъул рукIин. Ясалъул рос вукIунаро ва гьелъул эбелалъулги бетIергьанчи ватуларо. Гьес хIакъикъат бицуна ГIумар-асхIабида. Цинги ГIумарица жиндирго васалги ахIун, гьикъула: «Нужеда гьоркьов вугищ пуланай гIадан лъадилъун ячине бокьарав», - ян.
ГIабдуллагьица абула жиндир лъади йигин абун. ГIабдурахIманицаги абула гьединго. ГIасимица абула гьей жинца ячинин абун.
Гьес гьей ячуна ва гьезие гьаюла Лайла абурай яс. ГIасимил яс Лайла росасе кьола ГIабдулгIазиз ибн Марвание ва гьезие гьавула ГIумар ибну ГIабдулгIазиз. Нилъеда лъала ГIумар ибну ГIабдулгIазиз вукIаравлъи ритIухъав халип. Гьесул вилаяталда вакъарав чи толароан. РитIухълъиялъул рахъалъ гьесие кьуна щуабилев ритIухъав халип абураб цIарги.
