Рокьи цIикIкIинабулеб
Салам ккола, аварагас ﷺ хIадисалда абухъе, нилъеда гьоркьоб рокьи цIикIкIинабулеб жо. Салам кьей ккола хирияв аварагасул ﷺ кIудиял суннатазул цояб. Салам кьеялъ гьуинлъи цIикIкIинабула, вацлъи щулалъизабула. Салам ккола дугIаги.
Дунял-ахираталъул квешлъабаздаса, балагьаздаса, гIунгутIабаздаса, мунагьаздаса Аллагьас ﷻ мун цIунун тагиян абураб магIна ккола гьелъул.
Салам кьезе суннатаб буго, буссинабизе паризаяб буго. Салам кьун хадуб цояз гьеб буссинабичIони, гьезда аскIоса тIуреян абун буго, нагагь Аллагьас ﷻ гьезде тIаде балагь биччани, дудего щвечIого букIине.
РекIарас лъелго унесе, вилълъун унес чIун вугесе, вахъун чIарас гIодов чIарасе салам кьезе рекъараб буго.
Къуръан цIалулев, какичурулев чиясе салам кьезе рекъараб гьечIо, кьуни, буссинабизе ккола. Гьединго хутIба цIалулев, хIажат тIубалев чиясеги салам кьеларо. РатIалъун дагьабго заман иналде цIидасан дандчIвани, гьеб мехалъги салам кьела.
Рокъове лъугьуневщинахъе рукъалъул агьлуялъе салам кьуни, гьеб рукъалъул баракат тIаса унарилан хIадис буго.
Рокъов чи ватичIони «Ассаламу ГIалайна ва гIала гIибади ллагьи ссалихIин» абила.
«Ассаламу гIалайкумалъул» - анцIго, «Ассаламу гIалайкум ва рахIматуллагьалъул» - къого, «Ассаламу гIалайкум ва рахIматуллагьи ва баракатугьуялъул» лъеберго кири хъвала.
Къавмалдаса цояс кьуни ва цояс буссинабуни гIола, киназго кьезе ва киназго буссинабизе рекъараб бугониги.
ЧIахIияз гIисиназе салам кьезе суннатаб буго. Салам кьезе лъималги ругьун гьаризе ккола. Рокъор ругел эбел-инсуца, вац-яцаз цоцазе салам кьезеги суннатаб буго.
Херай чIужугIаданалъе, руччабазул къокъаялъе салам кьезе бегьула, квешал хивалазде, хIарамаб балагьиялде рачунел гьечIони.
Саламги рагIуледухъ кьезе ва рагIуледухъ буссинабизе ккола. РагIуледухъ буссинабизе тIадаб буго. Саламги кьун хехго цояв аскIоса ани, гьесда хадув векерун, гьесда рагIуледухъ салам буссинабизе тIадаб буго.
Кверал рачиналъ гъотIол тамах киниги, тIаса мунагьал гъенезарула.
Чияр бихьиназги руччабазги цоцазул кверал рачине хIарамаб буго. Изну тIалаб гьабичIого чияр рокъовеги лъугьинаро. Нахъвуссаян абуни, барщичIого нахъги вуссина. Боголидаса хадуб чияр рокъовеги инаро, телефоналъги ахIиларо, гьеб гIадамал регулеб гIуж кколелъул.
