ЛъикIай лъади

Хириясул ﷺ хIадисалда буго: «ЛъикIай чIужу Аллагьас ﷻ кьурасе Гьес ﷻ бащадаб диналъулъ кумек гьабуна», - ян (Анас, ХIаким). Жидеда Аллагь ﷻ разилъаял асхIабзаби рукIана дунялалъеги жидеегоги цIикIкIун пайда бугелъул аварагасда ﷺ цIехолеллъун. Алжаналъуб даража, ажру-кири ва тIадегIанаб макъам щвеялъе сабабалъе букIине.

«Ат-тавбаталъул» 34 аяталда буго (магIна): «Жидеца гIарац данде бакIарулел, гьеб хазинаде цIунулел ва гьелдаса паризаяб закагIатги кьоларел, Аллагьасул ﷻ диналъе гIоло гъазават гьабизеги бокьуларел гIадамазда дуца рохел бице, МухIаммад ﷺ, цIакъ унтизабулеб жужахIалъул гIаза букIине бугин гьезие ахираталдайилан абун».

Савбан абурав асхIабас бицана: «Ниж рукIана авараггун ﷺ цадахъ сапаралда. Цинги цо-цо асхIабзабаз, цебе рехсараб аяталъул бицунаго, аварагасда ﷺ гьикъана хIажалъи ккедал кумеклъун букIине нахъе цIунизе бищун лъикIаб щиб нижее бугебилан. Аварагас ﷺ жаваб гьабун абуна: «Бищун пайдаяб ва бищун лъикIаб буго Аллагь ﷻ рехсолеб, Гьесие ﷻ рецц гьабулеб, Гьесдаса ﷻ мунагьал чури тIалаб гьабулеб мацIги, Аллагьас ﷻ кьурал нигIматазе, лъикIлъабазе шукру гьабулеб ракIги ва диналъулъ квербакъулей муъминай чIужуги», - ян.

Аллагьасе ﷻ гьабулеб гIибадаталъулъ кумеклъунги жий йикIуней, ай Аллагьги ﷻ аварагги ﷺ ракIалде щвезаюлей, зинаялдасаги рос нахъчIвалей муъминай чIужугIадан инсанасе щвей ккола дунял-ахираталъул талихI. Хирияв аварагас ﷺ, цебе рехсараб лъабго жо, ай Аллагь ﷻ рехсолеб мацI, шукру гьабулеб ракI ва муъминай чIужу, жавабалъе хасс гьаруна гьездаса инсанасе гьаб ракьалда пайда цIикIкIун щолеб жо гьечIолъиялъ. БоцIи-мал буго нилъеца цIунизе кколеб жо ва амма гьал цере рехсарал жал руго дунял-ахираталда нилъ цIунулеллъун.

Лъадуца кидаго диналъулъ ва дунялалъулъ кумекги гьабулеб бугони, кидаго Аллагьасукьа ﷻ хIинкъиялдеги рос ахIулев вугони, хIалалаб ризкъиялдеги гьесизавулев вугони, рокъоса къватIиве унаго «ракъи нижеда хIехьезе кIола, амма Аллагьасул ﷻ гIазаб хIехьезе кIвеларо, гьединлъидал гьарула хIалалаб ризкъигун тIадвуссайин» абулебги бугони ва лъималазе битIараб, динияб тарбияги кьолеб бугони, дур эбел-инсул, гIагарлъиялъул адабги гьабулеб бугони, гьеб мехалъ аварагас r абухъе - «ГIадамаз бакIарулелъул бищун лъикIалдасан гьеб чарагьечIого ккола. Аллагьас ﷻ щивасе кьеги ункъункъ гьединал муъминал руччаби», - ян аби битIараб букIинарищ.

ЖАБИР МАЖИДОВ