Рокьи кин цIикI-кIинабилеб?
Аварагасде ﷺ рокьи цIикIкIинабулеб сабабал гIемерал руго, нилъеца гьел тIуралел ругони. Гьединлъидал бусурбабиги, аварагасде ﷺ бугеб рокьиялъулъ, батIи-батIияб макъамалда руго. Амма нилъ хIажаталлъун ккола аварагасде ﷺ рокьи цIикIкIинабизе.
Гьелда жаниб нилъее кIудияб рахIматги буго. Щайгурелъул нилъ къиямасеб къоялъ рокьаралгун цадахъ рукIине ругелъул. Аварагасул ﷺ хIадис буго: «Инсан вукIине вуго (къиямасеб къоялъ) жиндие рокьалгун цадахъ», - ян (имам Бухари).
Бищун кIудияб сабаблъун рикIкIуна аварагасде ﷺ жинца рокьи цIикIкIинабулеб суннат тIубай, гьелда нахъвилълъин, гIамал гьаби.
Гьединго рокьи цIикIкIинабула аварагасе ﷺ бокьараб жо бокьани, гьесда рихараб - рихани.
Салават гIемер цIали. Салават цIалулеб мехалъ кIудияб адабалдасан ккола гьев ﷺ аскIов вугев гIадин вукIин. Гьесул ﷺ тIадегIанлъи, къадру-къимат бичIчIун, гьев ﷺ тIолабго гIаламалъе рахIматлъун витIи, жив кинавниги аварагзабазул имамлъун вукIин, жив нуцIалъунги вугев такъваялде, ай Аллагьасдаса ﷻ хIинкъиялде, рачунев. Жив ﷺ мунагьал гьарурал гIадамазе шафигIлъунги вугев. Гьесие ﷺ буго бищун тIадегIанаб салават.
Аварагасул ﷺ тIабигIаталда нахъвилълъине хIаракат бахъила. Масала, сахаватлъи, сабру, цогидазул ургъел гьаби, чIухIи гьечIолъи, мискинзаби ва гIалимзаби рокьи.
РухIияб рахъ цебетIезабизе хIаракат бахъи. Балагье кин аварагас ﷺ таваккал тIамулеб букIарабали Аллагьасде ﷻ. РакIалда щвезабе аварагасда ﷺ бихьараб къварилъи ва гьес ﷺ гьабураб сабру.
Нилъ рукIине ккола гьевгун ﷺ дандчIвазе урхъун. Бокьизе ккола Къуръан, щайин абуни, гьеб гьесухъе ﷺ рещтIараб букIун. Гьеб бищун кIудияб мугIжизатлъунги ккола.
Аварагасул ﷺ цIар рагIанщинахъе рохизеги ккола. РагIичIеб ххвел гьабун тезе бегьуларо. Гьедин гьаби аварагасде ﷺ рокьи цIикIкIиналъе сабаблъун ккола.
ТIадегIанав Аллагьас ﷻ Къуръаналда абуна: «Дуца гьезда абе, МухIаммад, нужее Аллагь ﷻ вокьулев ватани, дида нахърилълъайилан, цинги Аллагьасе ﷻ нужги рокьилин», - абун.
Гьелъие далиллъун ккола гьадинаб хIадис: «ГIумар-асхIабас аварагасда ﷺ абула, цохIо дидасаго хутIун, кинабниги жоялдаса дие мун вокьулин абун. Аварагас ﷺ абула дур иман камиллъуларин дудасагоги дун вокьизегIан. Дагьаб хадуб ГIумар-асхIабас абула, гьанже дие мун дидасаги цIакъ вокьулин абун. Аварагас ﷺ абула ГIумарил иман гьанже камиллъанин абун».
Авараг ﷺ вокьичIони, нилъер иман камиллъиларо.
