Къун бергьа
Къун бергьа
Жиндир баракат нилъее щваяв СагIид-афандияс гIемер абулаан «Къун бергьа», - абун. Хадубги абулаан, гьедин гьабиялъулъ жинда маслихIатги батанин.
Ццим бахъиндал инсанасда кIочона кинабго, бадиса канлъи уна, тIубан гIакълу хIалтIуларо. Гьеб теялдалъун къезе чIаравги рикIкIунаан Мубаракас бергьаравлъун.
ХIадисалда буго: «РечIчIанхъун бергьунев чи гуро къуватавлъун кколев. Къуватавлъун ккола ццим бахъиндал жиндирго напсалда кверщел гьабизе кIолев чи», - ян (Бухари).
Дандиявгун къацандулелъул нилъеца жигар бахъизе ккола сабру гьабизе ва дагIба лъугIизабизе. Гурони, гьелъ къваригIел гьечIел жалазде нуцIа рагьула.
Аварагас ﷺ хIадисалда абулеб буго: «Нуж цIуне ццим бахъиналдаса. Щайин абуни, гьеб буго Адамил лъимадул рекIелъ боркьун бакараб цIа. Ццим бахъиндал нужеда бихьуларищ кин гьесул тIом багIарлъулебали ва бидурихьал понцIон рачIунелали», - абун (Абу-Давуд).
Нилъеда лъала ццим бахъиндал чиясда букIунеб хIал. Гьелъин аварагас ﷺ малъулебги бугеб ццим бахъиналдаса цIунейин абун.
Цо нухалъ Бичасул аварагас ﷺ абунин абун, Анас-асхIабас бицун буго: «Ццим бахъиндал гьеб къинабизе кIолесдаса Аллагьас ﷻ Жиндирго гIазаб нахъчIвала. ХIажат гьечIеб бициналдаса жиндирго мацI цIунулесулги Гьес ﷻ квешлъаби рахчула», - ян (ГIукъайли).
Сахав чияс ццим къезабизе гIамал гьабизе ккола.
Диналъ нилъ ахIула, кигIанго ритIарал ругониги, къец гьабунгутIиялде. ХIадисалда буго: «Жив мекъавги вукIун дагIба тарав чиясе Аллагьас ﷻ Алжаналъул рагIалда рукъ бала. ВитIаравги вукIун дагIба тарасе - Алжан бакьулъ бала рукъ…», - ан (Абу Давуд).
Балагьеха, кинаб куцалда бугониги дагIба тарав чиясе Аллагьасул ﷻ рахъалдаса щвезехъин бугеб ажру-даражаялъухъ.
Зулкъарнайница абун буго цо нухалъ жинда дандчIванила малаик. Имангун якъин цIикIкIинабулеб гIамал малъе жиндайин абидал, малаикас абунила: «Дур ццим бахъунге. ЩайтIаналъул инсанасда кверщел букIунеб мех буго ццим бахъараб заман», - илан.
Ццим бахъиндал инсанасул ракI хисула, гьелъ чи беццав, гIинкъав, гурхIел гьечIевлъун лъугьинавула, жахIда, хIасад, квешлъи гьаби гIадал нахъегIанал тIабигIаталги раккизарула.
Ццидал авал буго гIакълу ин, ахирги буго пашманлъи.
Аллагьас ﷻ цIунаги кколареб бакIалда ццим бахъиналдаса.
