Сахлъиялъул аслу
Инсан ккола Аллагьас ﷻ гIажаибаб къагIидалъ бижараб махлукъат. Абула инсанасул черх, ай анатомия лъазабуни, исламалда гьечIевги исламалде вачIунин абун. Гьединаб гIажаибаб къагIидаялъ Аллагьас ﷻ вижана инсан.
Инсанасе бищун хирияб жоги ккола сахлъи. Унтарав чияс бокьараб жоги кьола живго сах гьавизелъун. ГIемерисеб унтиги ккола кванидалъун, ай нилъеда кваназе лъангутIиялдалъун. Масала, аварагас ﷺ кваналеб букIаралъул хIисаб гьабуни, гьеб батула черхалъе бищунго пайдаяблъун. Авараг ﷺ гIорцIизегIан киданиги кваначIо. Гьединго нилъер сахлъи бараб буго рукIа-рахъиналдаги. Сахлъи цIуниялъе руго цо-цо шартIалги: квен, макьу рекъезаби, вагъа-вачари ва хIухьбахъи гьаби, заралиял жал рехун тей. Гьел шартIал тIуразарулев чи квешал унтабаз унти цIакъго къанагIатаб жо буго. Амма нилъеца гьел шартIал тIуразаруларо. ГIемерисел гIадамаз кваналеб буго хехго хIадур гьабулеб квен. Гьелъ инсанасул кванил къагIида хвезеги гьабула. Цинги загьирлъула батIи-батIиял унтаби. Гьеб киналъулго нилъеца пикру гьабуларо ва ракIалде кколаро квен сабаблъун унтанин абун. Унти рагIалде бакIаридал гурони тохтурзабазухъеги унаро.
Аварагасул ﷺ гIумруялъухъ балагьидал, нилъеда бихьула гьес ﷺ профилактика гьабулеб букIараблъи. Аварагас ﷺ черхалда хадуб халкколаан. Гьесул ﷺ гIемерисеб квенги букIана чамасдакIги лъимги. Амма нилъеда абулеб гьечIо гьебги кванан рукIайилан. Абулеб буго черхалъул ургъел гьабейин, кванил иш рекъезабейин абун. Черхалъулги жаваб кьезе кколелъулха. Аллагьас ﷻ нилъехъе черх кьун буго аманат хIисабалда. Гьелъин аварагас ﷺ абунги бугеб: «Къиямасеб къоялъ цIехезе ругел нигIматал ккола цIорораб рагIад, чамасдакI ва цIорораб лъим», - ян.
Заралияб квен кванаялдаго цадахъ цIакъго гIемер кваналелги руго нилъ. Чорхол къуват букIине ккани гIемераб квен къваригIунаро. ГIемераб квен кванайдал чиясул тIул, ракI, кванирукъ ва цогидалги лугбал унтула.
ГIемерисезул батула ракI унтун яги ракалъул унтаби. Гьел унтабиги загьирлъуларо инфекция, вирус сабаблъун. Гьел унтаби ккола кванил низам цIунунгутIиялъ, заралияб жо гIемер кванаялъ.
Аллагьас ﷻ нилъ унтабаздаса цIунаги, нилъерго ургъел гьабизе щивасе тавпикъги кьеги.
